Арманистон собиқ президенти Роберт Кочарян суд залидан касалхонага олиб кетилди

Арманистоннинг аввалги президенти Роберт Кочарян суд мажлисидан тўғридан-тўғри шифохонага олиб кетилди ва у ерда ётқизилди. Бу ҳақда унинг ўғли Левон Кочарян “РИА Новости”га маълум қилди.

Левон Кочарян суд биноси олдида тўпланган отасининг тарафдорларига шундай деди: “Президент шифокорларнинг кўрсатмасига биноан касалхонага олиб кетилди. Суд мажлиси унинг адвокатлари иштирокида давом этади. Қарор эса, катта эҳтимол билан, эрталаб эълон қилинади”.

25-август куни республика Антикоррупсия қўмитаси сиёсатчи ва унинг ўғли Седрак Кочарян Ереванда ҳибсга олинганини эълон қилган эди.

Арманистон Бош прокуратураси собиқ президентга нисбатан бир нечта моддалар бўйича иш очилганини аниқлаштирди. Булар мансаб ваколатини суиистеъмол қилиш, пора олиш ва жиноий даромадларни легаллаштириш моддаларидир. Айбланувчилар орасида яна бир собиқ давлат раҳбари Серж Саргсян ва 2007-йилда вафот этган собиқ бош вазир Андраник Маркарян ҳам бор. Шунингдек, Ереваннинг собиқ мери Гагик Бегларян ва бошқа олти киши ҳам ушбу ишга жалб қилинган.

Мухолифатдаги “Арманистон фраксияси” депутати Севак Хачатряннинг фикрича, Кочаряннинг ҳибсга олинишига 24-август куни ҳукумат мажлисида у ва бош вазир Никол Пашинян ўртасида юз берган оғзаки тортишув сабаб бўлган бўлиши мумкин.

Июн ойида сиёсатчининг адвокати Арам Орбелян Марказий сайлов комиссияси Арманистон блоки раҳбари Кочарянга нисбатан жиноий таъқиб бошлашга рухсат берганини айтган эди. Адвокатнинг тушунтиришича, бу иш 2004–2009-йиллардаги кўчмас мулк битимларига тааллуқли.

Бироқ унинг мижози бу битимларга умуман алоқадор эмас ва барча айбловлар сохта. У мансаб ваколатини суиистеъмол қилиш моддаси бўйича тергов ҳаракатлари 2018-йилдан бери давом этаётганини қўшимча қилди. Маълумот ўрнида, Роберт Кочарян 1998-йилдан 2008-йилгача Арманистон президенти лавозимида ишлаган.