Аризона конгрессига номзод сайловолди ташвиқоти белгисини таъмирлаётганда зўрланганини айтди

Аризона конгрессига номзод сайловолди ташвиқоти белгисини таъмирлаётганда зўрланганини айтди

Аризона конгрессига номзод ўз округида тунда сайловолди ташвиқоти белгиларини таъмирлаётганда автотураргоҳда зўрланганини маълум қилди.

Демократ Бернадетт Грин-Пласентия , external нашрига берган интервьюсида 14 август куни Финикс шаҳри атрофидаги Сан-Сити шаҳарчасида содир бўлган ҳужум пайтида ҳушидан кетганини ва ўзига келганида устида эркак киши турганини кўрганини айтди.

У полицияга дарҳол хабар бермаганини, балки икки ҳафтадан кейин Марикопа округи шерифи идорасига ариза топширганини билдирди.

Унинг республикачи рақиби Абрахам Хамаде ўз баёнотида расмийларни "ушбу жиддий айбловларни синчиклаб текширишга, жумладан, воқеа содир бўлган вақт ва жойдаги барча мумкин бўлган видеокамера ёзувларини топишга" чақирди.

"Ҳеч бир америкалик ўз маҳалласида жиноят қурбонига айланмаслиги керак", деди иккинчи муддатга ўз номзодини қўяётган Хамаде.

Грин-Пласентия Phoenix New Times нашрига "уялгани" ва "шунчаки унутишни хоҳлаганини", аммо бошқа қурбонлар учун ҳам овоз чиқариши кераклигини ҳис қилганини айтди.

Номзоднинг таъкидлашича, у сайловолди ташвиқоти пайтида сайловчиларга тез-тез Аризона аҳолиси учун курашаётганини айтади.

У Phoenix New Times нашрига шундай деди: "Агар жинсий зўравонлик қурбони бўлган аёллар учун ҳам курашмасам, бу гапни айтишда давом эта олмайдигандек ҳис қилдим".

Ҳужумдан сўнг, Грин-Пласентия икки кун давомида одамлар кўзидан йироқда бўлганини, эридан алоҳида квартирада қолганини ва сайловолди тадбирини ўтказиб юборганини айтди.

Phoenix New Times хабарига кўра, у яна пайдо бўлганида, эри, сайловолди штаби ходимлари ва атрофидаги бошқа одамлар унинг ўзини бошқача тута бошлаганини пайқашган.

Грин-Пласентия саккизинчи конгресс округида содир бўлган ҳужумдан кейин шифокорга мурожаат қилмаганини ва жинсий зўравонлик бўйича экспертизадан ўтмаганини айтди.

New York Times нашрининг ёзишича, у воқеалар ҳақидаги хотиралари тўлиқ эмаслигини ва ҳужум қилганларнинг бирортасини ҳам аниқ кўра олмаганини, аммо уларни оқ танли эркаклар деб таърифлаганини айтган.

У Phoenix New Times нашрига ҳужум қилганлардан бири унинг сиёсий қарашлари ҳақида нимадир деган бўлиши ва аёлларга нисбатан ҳақоратли сўз ишлатган бўлиши мумкинлигини, аммо бунга тўлиқ ишончи комил эмаслигини айтди.

Номзод сайловчилар буни асосан республикачилар устунлик қиладиган округда устунликка эришишга қаратилган сиёсий найранг сифатида баҳолашларидан хавотирда эканини билдирди. Шунингдек, у бу айбловлар унинг яшаш арзонлиги ҳақидаги асосий мурожаатини сояда қолдиришидан қўрқишини айтди.