Аргентинанинг ХВЖдан қарзи ундан кейинги олти давлатнинг жами қарзидан ҳам кўп
Аргентина Халқаро валюта жамғармаси олдидаги тўланмаган кредитлар ҳажми бўйича биринчи ўринда турибди. Унинг қарзи рейтингда ундан кейинги олти йирик қарздор давлатнинг жами мажбуриятларидан ҳам кўп. Иккинчи ўринни 14,4 миллиард доллар қарз билан Украина эгаллаган.
Аргентинанинг ХВЖ олдидаги қарзи ундан кейинги олти давлатнинг жами қарзидан ҳам юқори
Висуал Сапиталист инфографикасида ХВЖнинг 2026-йил октабр бошидаги маълумотлари асос қилиб олинган. Қарз суммалари АҚШ долларига айлантирилган. Рейтинг мамлакатларнинг умумий ташқи қарзини эмас, балки фақат жамғарма олдидаги тўланмаган кредитларини кўрсатади.
Украинадан кейинги ўринларда Покистон 10,8 миллиард доллар, Миср 10,6 миллиард доллар ва Эквадор 9,4 миллиард доллар қарз билан жойлашган.
Аргентинанинг йирик қарзи мамлакатнинг ХВЖдан узоқ йиллар давомида маблағ жалб қилиб келгани билан изоҳланади. Валюта инқирозлари, юқори инфляция ва халқаро капитал бозорларидан маблағ олишдаги қийинчиликлар уни жамғармага қайта-қайта мурожаат қилишга мажбур қилган.
2018-йилда валюта инқирози шароитида Аргентина учун 57 миллиард долларлик рекорд кредит дастури маъқулланган. 2022-йилда яна бир йирик келишувга эришилган.
2025-йил апрелида тасдиқланган навбатдаги дастур эса 20 миллиард долларлик молиялаштиришни, жумладан, дарҳол 12 миллиард доллар ажратишни назарда тутган. Маблағлар иқтисодиётни барқарорлаштириш, валюта захираларини тиклаш ва инвесторлар ишончини мустаҳкамлашга йўналтирилган. Бу суммалар алоҳида дастурлар ҳажми бўлиб, уларни қўшиш орқали мамлакатнинг ҳозирги қарзини ҳисоблаб бўлмайди.
Украинанинг қарз олиши Россиянинг 2022-йилда бошлаган кенг кўламли ҳужуми оқибатида юзага келган фавқулодда харажатлар билан боғлиқ. Манбага кўра, 2026-йил февралида Украина ХВЖ билан 8,1 миллиард долларлик янги молиялаштириш дастурини келишган. У уруш шароитида молиявий барқарорликни сақлашга хизмат қилиши кўзда тутилган.
Покистонда эса солиқ тушумларининг камлиги, хорижий валюта танқислиги ва энергетика соҳасидаги қарздорлик асосий муаммолар қаторида келтирилган. ХВЖ қўллаб-қувватлаётган ислоҳотлар солиқ базасини кенгайтириш, валюта захираларини тўлдириш ва давлат молиясини соғломлаштиришга қаратилган.