Аргентиналик регбичининг 2022 йилдаги қотиллиги учун икки эркак қамоқ жазосига ҳукм қилинди
Ўлимга олиб келган ўқларни узган собиқ аскар, 32 ёшли Лоик Ле Приоль 26 йилга озодликдан маҳрум этилди.
Аргентиналик регбичининг 2022 йилдаги қотиллиги учун икки эркак қамоқ жазосига ҳукм қилинди
Федерико Мартин Арамбуру 2022 йил март ойида Парижда отиб ўлдирилган эди
Тўрт йил аввал Париж кўчаларида собиқ Аргентина терма жамоаси регбичисини отиб ўлдирганликда айбланган, ўта ўнгчи гуруҳларга алоқадор икки эркак қамоқ жазосига ҳукм қилинди.
Аргентина терма жамоаси сафида йигирмадан ортиқ ўйин ўтказган Федерико Мартин Арамбуру 2022 йилда Сен-Жермен бульвари яқинидаги барда эрта тонгда юз берган муштлашувдан сўнг, ҳаракатланиб кетаётган машинадан очилган ўқлар натижасида ҳалок бўлган эди.
Ўлимга олиб келган ўқларни узган собиқ аскар, 32 ёшли Лоик Ле Приоль 26 йилга озодликдан маҳрум этилди. Биринчи бўлиб ўт очган 35 ёшли Ромен Бувье эса 19 йилга қамалди.
Жума куни Париж судида суд жараёни якунланар экан, Ле Приоль Арамбурунинг оиласидан кечирим сўради.
«Мен ҳам сиз каби христианман, бугун папа шу ерда», деди у Рим папаси Лев XIV нинг Францияга ташрифини назарда тутиб.
«Бу бирор белгими, билмайман... Бир кун келиб мени кечиришга куч топа оласиз деб умид қиламан», дея давом этди Ле Приоль.
Собиқ регби юлдузи Арамбуру ўлдирилганида 42 ёшда эди. У Аргентина терма жамоаси сафида 22 марта майдонга тушган, жумладан, 2007 йилда Францияда бўлиб ўтган Жаҳон чемпионатида мезбонлар дарвозасига лело (try) киритиб, ўз жамоасининг учинчи ўринни эгаллашига ёрдам берган.
Шунингдек, у 2010 йилда «Глазго Уорриорс» клубига қўшилишдан олдин Франциянинг «Перпиньян», «Биарриц» ва «Дакс» клубларида ҳам тўп сурган.
Тергов давомида ўрганилган кузатув камераси тасвирларида 2022 йил 19 март куни Арамбуру ва унинг собиқ жамоадоши Шон Хегарти барда собиқ аскар Ле Приоль ва унинг дўсти Бувьенинг рўпарасида ўтиргани акс этган.
Ўша пайтда Ле Приоль ва Бувьенинг иккаласи ҳам кейинчалик тарқатиб юборилган ўта ўнгчи экстремистик гуруҳга алоқадор бўлган.
Кузатув камераси тасвирларига кўра, икки гуруҳ ўртасида жанжал келиб чиққан.
Икки собиқ регбичи меҳмонхона томон пиёда кетаётганида, Ле Приоль ва Бувье уларни топиш учун машинада орқасидан бориб, ўт очишган. Reuters хабарига кўра, Арамбуру воқеа жойида вафот этган.
Кейинчалик Ле Приоль Украина чегарасини кесиб ўтишга уринаётганда Венгрияда қўлга олинган. Ўша пайтда у Венгрия полициясига Украинага жанг қилиш учун кетаётганини айтган.
Ҳимоя томони Ле Приоль ишида посттравматик стресс бузилишини, Бувье ишида эса болаликдаги жароҳатларни важ қилиб келтирди.
Бироқ судда Ле Приоль «ўлдириш иштиёқи билан ҳаракат қилган» деб таърифланди.
«Лоик Ле Приолнинг нарциссик, тажовузкор ва жиловлаб бўлмайдиган ғазаби охир-оқибат жаноб Арамбурунинг беҳуда ўлдирилишига олиб келди», деди раислик қилувчи судья.
Шу билан бирга, Арамбурунинг беваси Мария ўзи ва Арамбурунинг уч фарзандига «катталар сифатида ўз ҳаётларини қуришга» имкон берадиган ҳукм чиқаришни сўради.