Аргентина Фолкленд оролларида фаолият юритаётган нефть компаниясини нишонга олди
Бу қадам Президент Хавьер Милей Аргентинанинг Фолкленд ороллари устидан суверенитет даъволарини кучайтирганидан бир неча кун ўтиб амалга оширилди.
Аргентина Фолкленд ороллари яқинида фаолият юритаётган нефть компаниясига қарши чора кўрмоқда
Аргентина ҳукумати Фолкленд ороллари яқинидаги сувларда фаолият юритаётгани учун Navitas Petroleum нефть компаниясига нисбатан жиноий айбловлар қўзғатишини маълум қилди.
Ушбу баёнот Аргентина президенти Хавьер Милей Атлантика океанининг жануби-ғарбий қисмидаги Буюк Британиянинг денгиз орти ҳудудида бурғилаш ишларини олиб бораётган нефть компанияларига нисбатан санкциялар жорий этишини айтганидан бир неча кун ўтиб янгради.
Архипелаг устидан суверенитет масаласи 1982 йилда ушбу ҳудудга бостириб кирган Аргентина кучларини Британия ҳарбий контингенти сиқиб чиқарганидан кейин, орадан 40 йилдан кўпроқ вақт ўтган бўлса-да, Буюк Британия ва Аргентина ўртасида баҳсли бўлиб қолмоқда.
Узоқ давом этаётган низо ўтган ҳафтада, Милей халққа йўллаган мурожаатида "ўзгаришлар шамоли" Аргентинанинг Фолкленд оролларига бўлган даъвосини қўллаб-қувватлаётганини айтганидан кейин янада кучайди.
Милей илгари 1982 йилги можаронинг аргентиналик фахрийлари томонидан аргентиналиклар Лас-Мальвинас деб атайдиган Фолкленд ороллари масаласида "ҳаддан ташқари юмшоқлик" қилаётгани учун танқидга учраган эди.
Пайшанба куни кечқурун маҳаллий вақт билан қилган чиқишида Милей ҳукуматининг ушбу ҳудуд бўйича позициясини такрорлаб, "Мальвина ороллари тарихан ва ҳуқуқий жиҳатдан Аргентинаникидир... бу борада ҳеч қандай баҳс бўлиши мумкин эмас", деди.
Президент архипелагда нефть бурғилашни Аргентина суверенитетига "аниқ ва зудлик билан бартараф этилиши керак бўлган хавф" деб атади.
У шунингдек, 2013 йилги референдум натижаларини рад этди. Ўшанда ороллар аҳолисининг 99,8 фоизи Фолкленд оролларини Буюк Британиянинг денгиз орти ҳудуди сифатида сақлаб қолиш учун овоз берган эди.
Милей улар инглизлар томонидан "босиб олинган" ерда яшаётганликларини ва шу сабабли "ўз тақдирини ўзи белгилаш бўйича қонуний ҳуқуққа эга эмасликларини" айтди.
Британия ҳукумати Милейнинг нутқини рад этди ва Фолкленд ороллари бўйича ўз позицияси "тебранмас" эканини билдирди.
Милейнинг энг кўп томоша қилинадиган вақтдаги чиқиши вақтинчалик ҳолат экани ва у Буюк Британия билан дипломатик алоқаларни мустаҳкамлаш бўйича аввалги ёндашувига қайтади, деган ҳар қандай умидлар душанба куни унинг идораси Navitas Petroleum, унинг бир нечта шўъба корхоналари ва уларнинг раҳбарларига нисбатан жиноий айбловлар эълон қилганидан кейин чипакка чиқди.
Тель-Авив биржасида рўйхатдан ўтган Navitas компанияси 2028 йилда Шимолий Фолкленд ҳавзасида қазиб олишни бошлаши керак бўлган Sea Lion шельф нефть лойиҳасида 65 фоизлик улушга эгалик қилади.
Фолкленд оролларидан тахминан 130 миль (209 км) узоқликда жойлашган Sea Lion нефть конида тахминан 1,7 миллиард баррель нефть борлиги тахмин қилинмоқда.
Душанба кунги баёнотида Милей ушбу ҳудудда бурғилаш ишларини олиб бориш Аргентина расмийларининг розилигисиз ресурслардан фойдаланишни тақиқловчи Аргентина қонунчилигини бузишини айтди.
"Давлат Аргентина Республикасининг суверен ҳуқуқларини бузадиган ҳар қандай ҳаракатга қарши туриш учун зарур деб ҳисобланган чораларни кўришда давом этади", дейилади баёнотда.
Navitas ҳозирча охирги баёнотга жавоб бермади, бироқ ўтган ҳафтада Милейнинг сўзлари "Sea Lion лойиҳасини ривожлантириш фаолиятига, жумладан, лойиҳани ишлаб чиқишни якунлаш жадвалига сезиларли таъсир кўрсатиши кутилмаётганини" айтган эди.
Sea Lion лойиҳасида қисман улушга эга бўлган Rockhopper компанияси ҳам Милейнинг баёнотига ҳозирча изоҳ бермади.
Иккала компания ҳам аввалроқ Sea Lion лойиҳаси Фолкленд ороллари томонидан берилган ҳақиқий лицензияларга эга эканлигини маълум қилган.