АҚШнинг бир қатор шаҳарларида ўсмирлар “босқини”га қарши комендантлик соати жорий этилади
АҚШнинг бир қатор шаҳарларида ўсмирлар томонидан содир этилаётган "босқинлар"га қарши курашиш мақсадида комендантлик соати жорий этилмоқда. Бу "босқинлар" ижтимоий тармоқлардаги чақириқлар ортидан ёшларнинг катта гуруҳлари жамоат жойларига тўпланиши билан тавсифланади. Бундай йиғинлар баъзан зўравонлик, ҳибслар ва ҳатто ўлим билан якунланмоқда.
Шимолий Каролина штатининг Шарлотта шаҳри 18 ёшгача бўлган шахсларга соат 21:00 дан кейин кўчага чиқишни тақиқловчи комендантлик соати жорий этишни режалаштирмоқда. Шаҳар кенгаши аъзоси Данте Андерсоннинг СБС Невс нашрига 13-август куни маълум қилишича, Шарлотта Мекленбург полицияси май ойидан бери 40 дан ортиқ шундай ҳолатни қайд этган. Андерсоннинг сўзларига кўра, бу чора жамоат жойларида катта гуруҳ бўлиб йиғилаётган ёшларга қаратилган. У яқинда 15 ёшли ўсмирнинг отиб яраланганини мисол қилиб келтириб, бу йиғинларда зўравонлик кузатилаётганини таъкидлади. "Бу тақиқ нафақат шаҳар, балки биринчи навбатда ёшларнинг ўзи учун ҳимоядир", деди Андерсон.
10-июл куни Шарлотта шаҳридаги Университй Ситй Боардвалк ҳудудида ўтказилган ўсмирлар йиғини натижасида 12 нафар вояга етмаган шахс ҳибсга олинган ва 10 нафар ота-онага баённома расмийлаштирилган. Полиция маълумотларига кўра, ушбу ҳудудда 200 дан 300 гача ёшлар тўпланган. Шарлотта Мекленбург полицияси бошлиғи Эстелла Паттерсон шу ҳафтада шаҳар кенгаши мажлисида комендантлик соатини амалдагидан эртароқ белгилаш таклифини киритди. Ҳозирда 13 ёшгача бўлган болалар учун соат 22:00 дан, 13 ёшдан 15 ёшгача бўлганлар учун эса соат 23:00 дан кейин кўчага чиқиш тақиқланган. Паттерсон, "Агар биз бу йиғинларни назоратга олмасак, оқибатлари фожиали бўлиши мумкинлигидан жуда хавотирдаман", дея таъкидлади.
Флорида штатида эса вице-губернатор Жей Коллинз каби раҳбарлар ушбу муаммога бошқача ёндашувни таклиф қилмоқда. 4-июл кечаси Пенсакола шаҳрида ўтказилган ўсмирлар йиғини фожиа билан якунланган. Полиция маълумотларига кўра, етти киши ўқдан жароҳат олган ва 19 ёшли ўсмир ҳалок бўлган. Пенсакола марказида юзлаб одамлар тўпланган, уларнинг баъзилари уришиб кетган ва мушакбозлик қилган. Коллинзнинг сўзларига кўра, "Жавобгарлик — биз қила оладиган энг биринчи ишдир. Биз бундай тадбирларни ташкиллаштириб, одамларни хавф остига қўяётган ташкилотчиларни жавобгарликка тортмоқчимиз. Оқибатда ҳеч ким жароҳат олмаслигини истаймиз. Ота-оналар, илтимос, фарзандларингиз тўғри иш қилаётганига ишонч ҳосил қилинг".
Аввалроқ Таиландда 9-синф ўқувчиси мактабда отишма уюштириб, 7 кишини ўлдиргани ҳақида хабар берилганди. У ҳужумдан олдин уйида бобо-бувисини отиб ўлдирган.