АҚШлик қотил Криста Пайкни қатл этиш режаси ижро этилишига бир соат қолганда тўхтатилди
Пайк 1996 йилда Коллин Слеммерни ўлдирганликда айбланиб, ўлим жазосига ҳукм қилинган эди.
Теннесси штатидаги маҳкума Криста Пайкнинг қатл этилиши белгиланган вақтдан бир соат олдин тўхтатилди.
Агар қатл амалга оширилса, Пайк Теннесси штатида охирги 200 йилдан ортиқ вақт ичида қатл этилган биринчи аёл бўлади.
50 ёшли Пайк 1996 йилда Коллин Слеммерни ўлдирганликда айбланиб, ўлим жазосига ҳукм қилинганидан бери ўлим камерасида қолмоқда.
Чоршанба куни Олтинчи округ апелляция суди судьялари Пайк иши бўйича далилларни кўриб чиқиш учун қўшимча вақт кераклигини маълум қилишди. Кечиктириш қанча давом этиши ҳозирча номаълум.
Ушбу қарор АҚШ Олий судининг қатлни вақтинча тўхтатиш ҳақидаги илтимосни рад этгани ва Теннесси губернаторининг шу ҳафта бошида Пайкнинг афв этиш ҳақидаги сўровини рад этиш тўғрисидаги қароридан кейин қабул қилинди.
Унинг адвокатларининг таъкидлашича, Теннесси штати йиллар давомида судларга Пайк болалигида жинсий зўравонликка учрагани ҳақида ёлғон гапирганини айтиб келган.
Бироқ, яқинда уни қатл этиш усули бўйича бўлиб ўтган эшитувда штат расмийлари унинг жинсий зўравонлик ва зўрлаш қурбони бўлганини инкор этмасликларини билдиришди.
Пайкнинг ҳимоячилар гуруҳи апелляция судидан унинг илтимосномасини округ судига қайтаришни сўради ва агар федерал судлар штатнинг аввалги «у ёлғон гапиряпти» деган даъвосига таянган бўлса, унда федерал кўриб чиқиш жараёни бузилганлигини таъкидлади.
Пайк 18 ёшида ўзининг ўша пайтдаги йигити билан биргаликда муаммоли ўсмирлар учун мўлжалланган касб-ҳунарга ўргатиш лагерида танишган 19 ёшли Коллин Слеммерни калтаклаган, қийноққа солган ва ўлдирган.
Ушбу қотиллик 1995 йилда Теннесси штатининг Ноксвилл шаҳрида ОАВда катта шов-шувга сабаб бўлган эди, чунки ўсмир қизнинг кўкрагига шайтоний гуруҳлар рамзи бўлган пентаграмма чизилган ҳолда топилган. Пайк пентаграммани ўзи чизганини инкор этган.
У Слеммер уни ҳақорат қилгани ва йигитини тортиб олмоқчи бўлганини айтган. Лагернинг яна икки нафар яшовчиси кейинчалик Пайк қотиллик содир бўлишидан олдин ва кейин бу билан мақтангани ва уларга Слеммер бош суягининг бир бўлагини кўрсатгани ҳақида кўрсатма берган.
Унинг адвокатлари «18 ёшли мия ҳали катталар мияси эмас» ва Пайк қотиллик содир этилган вақтда бунинг учун ўлим жазосини олиш учун жуда ёш бўлганини даъво қилишмоқда.
Теннесси жазони ижро этиш департаменти маълумотларига кўра, Пайк қамоққа олинган вақтида ўлим жазосига ҳукм қилинган энг ёш маҳкум эди.