АҚШлик миллиардер Леон Блэк чақирув қоғозини рад этди ва Эпштейн комиссиясини судга берди
Даъвода Вакиллар палатасининг Назорат қўмитаси томонидан унга ошкор қилмаслик тўғрисидаги келишувларни тақдим этиш мажбуриятини юкловчи чақирув қоғозлари «ҳақиқий эмас» деб аталган.
АҚШлик миллиардер Леон Блэк чақирув қоғозини эътиборсиз қолдирди ва Эпштейн қўмитасини судга берди
Миллиардер инвестор Леон Блэк марҳум жинсий жиноятчи Жеффри Эпштейн ишини текшираётган АҚШ Конгресси қўмитаси ҳузурига келмади ва бунинг ўрнига қўмитанинг уни чақиришга бўлган уриниши устидан даъво аризаси киритди.
Даъво аризасида Вакиллар палатасининг Назорат қўмитаси томонидан юборилган чақирув қоғозлари «ҳақиқий эмас» деб таърифланган ва уларнинг қўмитанинг қонунчилик мақсадларига «ҳеч қандай қонуний алоқаси йўқлиги» айтилган.
Қонунчиларнинг билдиришича, Блэк июнь ойида ихтиёрий равишда кўрсатма бераётган пайтда, ўзи имзолаган бўлиши мумкин бўлган сир сақлаш тўғрисидаги келишувлар (NDA) ҳақида сўроқ қилинганидан кейин қўмита йиғилишини тарк этган.
Блэк Эпштейн билан бўлган алоқаларида ҳеч қандай қонунбузарликка йўл қўймаганини даъво қилмоқда.
Блэкдан сир сақлаш тўғрисидаги келишувларни тақдим этишни ва қасамёд остида камера қаршисида кўрсатма беришни талаб қилувчи чақирув қоғозлари у июнь ойида қўмита йиғилишини тарк этганидан кейин юборилган эди.
Унинг чақирув қоғозларига қарши пайшанба куни Вашингтон федерал судига топширган даъво аризасида айтилишича, сир сақлаш тўғрисидаги келишувларнинг ошкор қилиниши «ўз шахсий ҳаётини қадрлайдиган, Эпштейн билан ҳеч қандай маълум ёки оммавий алоқаси бўлмаган, махфийлик бўйича келишиб олган ва уни бекор қилишдан бош тортган аёлларни хавф остига қўйиши мумкин».
Сир сақлаш тўғрисидаги келишувлар (NDA) — бу иккала томон ҳам, кўпинча келишув ёки ишга жойлашиш шартномасининг бир қисми сифатида, маълумотларни махфий сақлашга ваъда берадиган битимлардир.
«Бу энди Эпштейн ҳақидаги ҳақиқатни аниқлаш эмас. Бу жаноб Блэкни йўқ қилишга уринишдир», деди Блэкнинг адвокати Сьюзан Эстрич пайшанба куни тарқатилган пресс-релизда.
«Конгресс ваколатларининг суиистеъмол қилинишига жавобан ушбу даъво аризасини беришдан ўзга чорамиз қолмади».
«Бугун кўрсатма беришдан бош тортиш орқали Леон Блэк Конгресснинг иккита чақирув қоғозига бўйсунмаяпти», деди қўмита аъзоси Роберт Гарсия Блэк келмаганидан кейин берган баёнотида.
«Унинг Эпштейн билан алоқалари ва ҳамкорлик қилишни истамаслиги қабул қилиб бўлмас ҳолатдир. Биз уни зудлик билан Конгрессга ҳурматсизлик қилганликда айблашимиз керак», дея қўшимча қилди Гарсия.
Конгрессга ҳурматсизлик қилиш қўмитанинг Блэкни жиноий жавобгарликка тортиш масаласини кўриб чиқиш учун Адлия вазирлигига юборишига олиб келиши мумкин.
«Леон Блэкнинг Америка халқига жавоб бериш ўрнига суд жараёнлари орқасига яширинаётгани ачинарли», деди раис Жеймс Комер. «Жаноб Блэкнинг кўрсатмаси терговимиз учун жуда муҳим».
Блэк Эпштейнни бойликни бошқариш бўйича маслаҳатчи сифатида ёллаганини айтган ва июнь ойида Вакиллар палатасининг Назорат қўмитасига уларнинг кўп йиллик муносабатлари давомида қонуний сабабларга кўра Эпштейнга 158 миллион доллар (120 миллион фунт стерлинг) тўлаганини билдирган.
У Эпштейннинг «ноқонуний фаолияти ҳақида то 2019 йил июль ойида Эпштейн одам савдосида айблангунига қадар билмаганини» айтган.
Блэкнинг исми Адлия вазирлиги томонидан эълон қилинган, обрўсизланган марҳум молиячи билан боғлиқ фотосуратлар, видеолар ва тергов ҳужжатларини ўз ичига олган Эпштейн файлрида пайдо бўлган.
Ҳужжатларда исми тилга олиниши қонунбузарликни англатиши ҳақида ҳеч қандай далил йўқ.
Суд ҳужжатларига кўра, Блэк собиқ россиялик модель Гузел Ганиева билан олти йил давомида ишқий муносабатда бўлган ва бу муносабатлар зўравонлик айбловлари билан якунланган.
Ганиеванинг Блэкка қарши берган (кейинчалик рад этилган) даъво аризасига кўра, у 2015 йилда Ганиевани сукут сақлашга мажбур қилиш учун сир сақлаш тўғрисида келишув лойиҳасини тайёрлаган.
АҚШ Адлия вазирлиги томонидан эълон қилинган ҳужжатларга кўра, Эпштейн Блэкка маслаҳатлар берган, жумладан, ўз ёрдамчисига йўллаган электрон хатида Блэкка Ганиева билан боғланиш учун собиқ ҳуқуқ-тартибот идоралари ходимларини ёллашни таклиф қилган.
Блэкнинг адвокати Эстрич Ганиеванинг айбловини «мутлақо ёлғон» деб атади. Блэк илгари ўзининг товламачилик қурбони бўлганини айтган эди.
Судья якунда Ганиеванинг даъво аризасини рад этди ва бунга у имзолаган сир сақлаш тўғрисидаги келишув ҳамда ушбу битим тузилганидан кейинги йилларда олган тахминан 9 миллион доллар (6,6 миллион фунт стерлинг) маблағни сабаб қилиб кўрсатди.
Блэк 2021 йилда ўзи ҳаммуассис бўлган Apollo Global Management компаниясини тарк этди ва ўша пайтда Эпштейн билан алоқалари туфайли «тинсиз жамоатчилик эътибори ва ОАВ назорати» унинг соғлиғига «салбий таъсир кўрсатганини» айтди.