АҚШлик актёр Чед Лоу 13 ёшли қизи Фионанинг вафотидан «қаттиқ қайғуда»
Лоу ва унинг рафиқаси Ким Пейнтер «ҳаётимизнинг нури эди» дея ўз қизларининг вафотини эълон қилишди.
АҚШлик актёр Чед Лоу ва унинг рафиқаси, продюсер Ким Пейнтер ўзларининг «севимли» 13 ёшли қизи Фионанинг вафотидан кейин «қаттиқ қайғуда» эканликларини маълум қилишди.
«У ақлли, ижодкор ва рақсга тушишни яхши кўрадиган меҳрибон қиз эди», — дейилади оиланинг баёнотида.
«Опа-сингиллари уни жуда яхши кўришарди, ота-онаси учун эса у суюкли фарзанд эди. Тўғрисини айтганда, у ҳаётимиз нури эди.
Унинг вафоти бутун оиламиз учун оғир жудолик бўлди ва биз бундай пайтда дуо қилишингизни ҳамда шахсий ҳаётимизни ҳурмат қилишингизни сўраймиз».
Баёнот қуйидаги сўзлар билан якунланган: «Агар сиз ёки сиз танийдиган бирор киши руҳий саломатлик билан боғлиқ муаммоларга дуч келаётган бўлса, илтимос, 988 рақамига қўнғироқ қилиш ёки хабар юбориш орқали 988 Суицид ва инқирозли вазиятларда ёрдам бериш тармоғига мурожаат қилинг».
Актёр Роб Лоунинг акаси бўлган Чед Лоу 1993 йилда «Life Goes On» телешоуси учун «Эмми» мукофотини қўлга киритган, шунингдек, «Pretty Little Liars» ва «Supergirl» каби дастурларда суратга тушган.
У ва Пейнтернинг яна икки нафар қизи бор: 17 ёшли Мейбел ва 10 ёшли Никси.