АҚШдан жавоб кутаётган Эрон ва Россияга келаётган «минглаб» кореялик аскарлар – кун дайжести
Ўтган кун давомида жаҳонда рўй берган энг асосий воқеа ва янгиликлар шарҳи билан кундалик хабарномада таништирамиз.
АҚШ жавобини кутаётган Эрон ва Россияга йўл олаётган «минглаб» кореялик аскарлар – кун дайжести
АҚШ ва Эрон вакиллари душанба куни воситачилар билан алоҳида-алоҳида музокаралар олиб борди. Бу музокаралар етти ойлик урушни тўхтатишга қаратилган янги саъй-ҳаракатлар доирасида бўлиб ўтди.
Реутерс ёзишича, бу ҳафта бўлиб ўтадиган ҳар қандай музокара БМТ тадбирлари доирасида Эрон томонидан тақдим этилган етти кунлик таклифнинг қайта ишланган вариантига бағишланади.
Эроннинг етти кунлик режаси барча фронтларда жанговар ҳаракатларни тўхтатиш, Эроннинг миллиардлаб долларлик активларини музлатишдан чиқариш, унинг нефтига қўйилган санксияларни бекор қилиш ва АҚШ блокадасини олиб ташлашни кўзда тутади.
Шундан кейин Эрон Ҳормуз бўғозининг қайта очилишига рухсат беради. Томонлар Эроннинг ядро дастури ва юқори даражада бойитилган уранни йўқ қилиш бўйича музокараларни қайта бошлайди. Трамп шанба куни бу таклифларни рад этган эди.
Эрон ОАВларига кўра, ташқи ишлар вазири Аббос Арақчи сўнгги таклифларга АҚШнинг расмий жавобини кутмоқда. «Агар америкаликлар келишувга ёки тинч ечимга эришмоқчи эканини даъво қилишса, биз ана шу ечимни тақдим этдик», деди Арақчи.
Президент Доналд Трамп ҳам қўшимча тафсилотларни ошкор қилмаган ҳолда, душанба куни АҚШ расмийлари воситачилар билан алоҳида мулоқот ўтказганини айтди.
Уруш феврал ойи охирида АҚШ ва Исроилнинг Эронга ҳужумлари билан бошланган бўлиб, етти ой давомида минглаб одамлар ҳаётига зомин бўлди. Нефт ташиш учун ҳаётий муҳим бўлган денгиз йўллари тўсиб қўйилгани сабабли жаҳон бозорларини ларзага солди. АҚШ ва Эрон аввалроқ воситачилик орқали ўтказилган тинчлик музокараларида икки марта — апрел ва июн ойларида — ўт очишни тўхтатишга келишганди. Бироқ бу келишувлар тезда барбод бўлган.
Шимолий Корея Россияга 10 мингга яқин ҳарбий хизматчини жўнатишга тайёргарлик кўрмоқда. Шу билан бирга, саккиз мингдан ортиқ шимоллик аскар аллақачон мамлакат ҳудудида бўлиб турибди. Бу ҳақда разведка маълумотларига таяниб, душанба кунги мурожаатида Украина президенти Володимир Зеленский маълум қилди.
Украина раҳбарининг айтишича, ҳозирда ҳарбийлар «тайёргарликдан ўтиш ва кейинчалик жўнатилиш учун танлаб олинмоқда». «Россия ҳукумати хорижликларни ёллашни кўпайтиришни режалаштирмоқда. Россия ўз армиясига одамларни жалб қилаётган мамлакатлар ҳукуматлари бунга қаршилик кўрсатиши муҳим. Биз ҳар бир ҳукуматни хабардор қиламиз», деди Зеленский.