АҚШда нефт захиралари 1983-йилдан бери энг қуйи даражага тушди

АҚШда нефт захиралари 1983-йилдан буён энг паст даражага тушиб кетди.

АҚШ федерал агентлиги бўлган Ҳукумат ҳисобдорлиги идораси аудиторлари мамлакатнинг стратегик нефт захираси янги инқирозларни енгиш учун чекланган имкониятларга эга эканлиги ҳақида хулоса берди. Бу ҳақда Бриефс Финансе нашри хабар берди.

АҚШ Федерал бюджет назорати бошқармасининг май ойидаги ҳисоботига кўра, Энергетика вазирлиги вакиллари захиранинг эскирган қувурлар, омборлар ва резервуарлар тармоғини "ямаб-ясқаб қўйилган" деб таърифлаб, унинг қанча муддат хизмат қилиши номаълумлигини таъкидлаган.

"Стратегик нефт захирасининг ресурсларни олиш, тақсимлаш ва тўлдириш имкониятлари ҳозирда чекланган. Эскирган инфратузилма билан боғлиқ кўп йиллик муаммолар ҳамда уларни бартараф этишга қаратилган кенг кўламли қурилиш ишлари сабабли бу имкониятлар келажакда хавф остида қолиши мумкин", дея огоҳлантирган АҚШ Федерал бюджет назорати бошқармаси ўз ҳисоботида.

Март ойида Эрон Ҳормуз бўғози орқали юк ташишни тўсиб қўйганидан сўнг, АҚШ президенти Доналд Трамп стратегик нефт захирасидан 172 миллион баррел нефт олишни буюрган. Энергетика вазирлиги маълумотларига кўра, ўтган ҳафта давомида федерал захиралар 3,7 миллион баррелга камайиб, уларнинг умумий ҳажми қарийб 308 миллион баррелни ташкил этди. Бу 1983-йил мартидан бери қайд этилган энг паст кўрсаткич ҳисобланади.

Бошқарма маълумотларига кўра, захиранинг 25 фоиздан ортиғи "қурилиш ишлари тўхтатилгани ва ерости омборлари ёпилгани сабабли" қазиб олиш учун яроқсиз ҳолга келган. Рапидан Энергйънинг июл ойидаги ҳисоботида айтилишича, ҳозирги вақтда камида 103 миллион баррел нефтни олишнинг имкони йўқ.

Июн ойида Реутерс нашри АҚШ Украина ва Эрондаги уруш ортидан дунёдаги энг йирик нефт экспортчисига айланганини хабар қилганди. Бу воқеа ўн йилликлар давомида Саудия Арабистони ва Россия етакчилик қилиб келган тартибни ўзгартириб юборган.