“АҚШда Эрон билан урушни тугатиш стратегияси йўқ” — Шумер
АҚШда Эрон билан урушни якунлаш стратегияси мавжуд эмаслиги ҳақида Сенатдаги демократлар етакчиси Чак Шумер Х ижтимоий тармоғидаги саҳифасида маълум қилди.
Шумернинг таъкидлашича, уруш бошланганига олти ой бўлганига қарамай, Эрон Ҳормуз бўғозини босим воситаси сифатида ушлаб турибди, АҚШда бензин нархлари рекорд даражага кўтарилган ва 18 нафар америкалик ҳарбий ҳалок бўлган. Сенаторнинг сўзларига кўра, Президент Трамп ўзи бошлаган бу ҳалокатли урушни қандай тугатиш бўйича ҳали ҳам аниқ стратегияга эга эмас.
Унинг фикрича, уруш АҚШ ҳарбий захираларининг камайишига, мамлакатнинг ҳарбий мавқейининг заифлашишига ва бензин нархларининг ошишига олиб келган. Шумер Эрон билан олиб борилаётган операцияни муваффақияцизлик деб атаган.
Вакиллар палатасидаги демократлар етакчиси Ҳаким Жеффрис ҳам урушни масъулияциз деб атаб, АҚШ уруш вазири Пит Ҳегсетни лавозимидан озод қилишга чақирган. Жеффриснинг айтишича, уруш тугаши, солиқ тўловчиларнинг пуллари эса одамлар ҳаётини арзонлаштиришга сарфланиши керак.
АҚШ ва Исроилнинг Эронга қарши ҳарбий операцияси 28-феврал куни бошланган эди. Трамп дастлаб уруш бир неча ҳафта давом этишини айтган бўлса-да, можаро олти ойдан ошди. Реутерс агентлигининг хабар беришича, Оқ уй ҳарбий босим, музокаралар ва иқтисодий санксияларни навбатма-навбат қўллаганига қарамай, урушни якунлашнинг аниқ йўлини ҳозирча топмаган.
Аввалроқ Трамп АҚШ Эрон билан урушни тез орада келишув ёки қатъий чоралар орқали якунлашини айтганди. Июл охирида эса Трамп Эрон билан урушни давом эттириш бўйича учта вариантни кўриб чиқаётгани маълум бўлган эди. Улар ҳарбий эскалацияни кучайтириш, Эронга янги иқтисодий босим ўтказиш ёки АҚШ ғалаба қозонганини эълон қилиб можародан чиқишни назарда тутган.
Эрон президенти Масъуд Пезешкиён ҳам аввалроқ урушни бугуннинг ўзида тугатган маъқул эканини айтган эди. Унинг фикрича, можарани чексиз давом эттириш мақсад бўлиши мумкин эмас. Шу билан бирга, Эрон томони урушни Трамп президентлик муддати тугагунча, яъни яна бир неча йил давом эттириш имкониятини ҳам тилга олган.