АҚШда боши қўшилиб кетган сиам эгизаклари ажратиб олинди
АҚШда боши туташ туғилган сиам эгизаклари ажратиб олинди
АҚШнинг Миссури штатидаги Сент-Луис шаҳрида жарроҳлар боши бириккан ҳолда дунёга келган эфиопиялик икки ёшли эгизакларни муваффақиятли ажратиб олди. Ҳозир опа-сингиллар реабилитация жараёнидан ўтмоқда ва мустақил ўтириш ҳамда гапиришни ўрганмоқда.
Эгизаклар бир неча ой давомида операцияга тайёрланган
Ҳияб ва Вуҳбто исмли қизалоқлар Эфиопияда жуда кам учрайдиган туғма нуқсон — краниопагия билан туғилган. Бунда сиам эгизакларининг бош қисми бир-бирига туташган бўлади.
2025-йил март ойида, бир ёшга тўлишига яқин қизалоқлар Сент-Луисга олиб келинган. Эгизакларни ажратиш операцияси учун турли йўналишдаги мутахассислардан иборат жамоа бир неча ой давомида пухта тайёргарлик кўрган.
Операция 2026-йилнинг 24–25-феврал кунлари Сент-Луисдаги ССМ Ҳеалтҳ Сардинал Гленнон болалар шифохонасида ўтказилган. Тайёрлов жараёнидан тортиб жароҳатларни тикиш босқичигача бўлган бутун жараён 24 соатдан ортиқ давом этган. Операция тафсилотлари жамоатчиликка яқинда, тиббий конференсия давомида эълон қилинди.
Қизалоқлар ўтириш, овқатланиш ва гапиришни ўрганмоқда
Операциядан сўнг Ҳияб ва Вуҳбто Миссури штатининг Мериленд Ҳайц шаҳридаги Ранкен Жордан Педиатрис Бридге Ҳоспитал шифохонасида реабилитациядан ўтмоқда.
Қизалоқларда бир нечта мураккаб операциялардан кейин фаоллик тикланмоқда. Уларга клиник жамоа ва ҳамкор ташкилотларнинг 60 нафардан ортиқ мутахассиси иштирокида доимий тиббий ёрдам кўрсатилмоқда.
Ранкен Жордан шифохонасининг тиббий трансформация бўлими раҳбари, доктор Ник Ҳолекампнинг айтишича, ҳозирда опа-сингиллар болалар кўникмаларини мустақил ўзлаштира бошлаган.
“Гап жуда оддий кўникмалар ҳақида кетмоқда, масалан, гавдани тик тутиб ўтириш, кейинчалик эса туриш ва юриш. Ҳозир улар овқатланиш, гапириш, мулоқот қилиш ва бошқа болалар ёки бир-бири билан ўйнашни ўрганмоқда. Бу, албатта, мўжизавий”, деди доктор Ник Ҳолекамп.
ССМ Ҳеалтҳ Сардинал Гленнон болалар шифохонаси президенти ва ССМ Ҳеалтҳ тизимининг педиатрия йўналиши бўйича вице-президенти, доктор Ҳосейн Маранди ушбу натижа мутахассисларнинг ҳамжиҳатликдаги меҳнати самараси эканини таъкидлади:
“Ҳияб ва Вуҳбтони муваффақиятли ажратиб олиш фақатгина йирик тиббий ютуқ эмас. Бу педиатрия соҳасида жаҳон даражасидаги билим ва тажриба, меҳр-шафқат, инновациялар ҳамда қатъият болалар манфаатлари йўлида бирлаштирилганда қандай натижаларга эришиш мумкинлигининг яққол исботидир”.
АҚШ Миллий тиббиёт кутубхонаси маълумотларига кўра, бундай ҳолатлар тахминан ҳар 2,5 миллион тирик туғилган эгизаклардан бирида учрайди ва сиам эгизакларининг олти фоизидан камини ташкил этади.
2023-йилда ўзбек тиббиёти тарихида илк бор шифокорлар томонидан сиам эгизаклари ўта ноёб операция натижасида ажратиб олинганди. Чақалоқлар танасининг қорин қисми, аниқроғи, жигари билан бирлашган ҳолда туғилган эди.