АҚШ ва Эрон ўртасида тўқнашув кескинлашди: томонлар бир-бирига яна зарба берди (видео)
АҚШ ва Эрон ўртасидаги зиддият кескинлашди: томонлар бир-бирига яна зарба берди (видео)
АҚШ 2-сентябрга ўтар кечаси Эронга қарши кенг кўламли ҳаво ҳужумларини амалга оширди. Теҳрон ҳам бунга жавобан зарбалар берди. Бу сўнгги ҳафталардаги энг жиддий кескинлашув бўлиб, жаҳон энергия нархларининг ошишига олиб келди ва АҚШ президенти Доналд Трампнинг мамлакат ичидаги обрўсига салбий таъсир кўрсатди. Бу ҳақда Реутерс хабар берди.
Ҳужумлар ортидан 2-сентябр куни нефт нархи бир баррел учун 4 доллардан ошиб, сўнгги беш ҳафтадаги энг юқори даражага етди. Маълумотларга кўра, Теҳрон Иордания, Баҳрайн ва Ироқдаги АҚШ обьектларига жавоб зарбалари берган.
Эрон Форс кўрфазидан нефт экспорт қилинишига йўл қўймаслигини билдирди. Трамп эса Эронга қаттиқ зарба бериш билан яна таҳдид қилди. АҚШ Молия вазири Скотт Бессент Вашингтон янги санксиялар киритишини маълум қилди.
Эрон Қизил Ярим Ой жамияти хабарига кўра, Ҳормуз бўғозидаги Сирик соҳили яқинида тўй маросими вақтида ҳужум уюштирилган. Натижада 5 киши ҳалок бўлиб, 50 киши яраланган. Меҳр агентлигининг билдиришича, ҳалок бўлганлар орасида 4 ёшли бола ҳам бор. ИРНА агентлиги эса вилоят расмийсига таяниб, ярадорлар сони 68 кишига етганини маълум қилди.
Эрон Ислом инқилоби қўриқчилари корпуси (ИИҚК) баёнотида таъкидланишича, АҚШ ҳужумлари Ҳормуз бўғозидаги вазиятни янада кескинлаштирган. Урушгача дунё нефтининг ҳар бешинчи баррели шу бўғоз орқали ташилган.
Эрон парламенти спикери Муҳаммад Бағир Ғалибафнинг баёнотига кўра, агар “душман” Теҳроннинг Форс кўрфазидан нефт экспорт қилишига тўсқинлик қилса, у ҳолда ҳеч ким нефт экспорт қила олмайди.
АҚШ Марказий қўмондонлиги ИИҚК обьектларига зарба берганини билдирди. Ҳужумлар ҳаво мудофааси тизимлари, радарлар, денгиз активлари, мина қўйиш воситалари ва алоқа обьектларига қаратилган.
Эрон ОАВ хабарига кўра, АҚШ ракетаси Аҳвоз шаҳри яқинига ва Жирофт фуқаро аеропортига тушган. Шунингдек, Чобаҳор порти, Бандар Аббос шаҳри ва Асалуе газ марказида портлашлар эшитилган. Эрон давлат телевидениеси Қешм оролида ҳам портлашлар бўлганини маълум қилди.
Трамп Эронни жавоб қайтаришдан огоҳлантирди. У янада кучлироқ зарба бериш билан таҳдид қилди.
“Агар Эрон жавоб зарбалари берса, Ислом Республикасидан деярли ҳеч нарса қолмайди!”, деб ёзди у ижтимоий тармоқда.
Бунга қарамай, ИИҚК Иорданиядаги базага баллистик ракеталар учирганини билдирди. Улар кўплаб АҚШ ҳарбийлари ҳалок бўлганини даъво қилди. Бироқ Реутерс агентлигининг АҚШ расмийларига таяниб билдиришича, Иорданиядаги ҳужумдан ҳеч ким жабрланмаган.
Эрон ҳарбийлари Баҳрайндаги АҚШ базасига дронлар билан ҳужум қилгани айтилмоқда. Кувайт армияси ҳаво мудофааси душман дронларига қарши ишлаётганини билдирди. Иордания Қуролли кучлари қироллик ҳаво ҳудудига кирган 13 та баллистик ракетадан 10 тасини уриб туширди, яна учтаси кимсасиз ҳудудларга тушди. Баҳрайн ҳам Эрон дронлари йўқ қилинганини маълум қилди.
ИИҚК қуруқликдаги кучлари Ироқ шимолидаги Эрбил шаҳридаги АҚШ базаларига ҳужум қилди. Натижада таъмирлаш иншооти, техник омборлар ва кузатув шари бошқарув тизими йўқ қилинди. Шунингдек, ёнилғи баклари ёнгани ва бир нечта АҚШ ҳарбийлари ҳалок бўлгани даъво қилинди.
АҚШ бир неча ҳафталик танаффусдан сўнг 31-августга ўтар кечаси ҳам Эронга янги зарбалар берганди. Бунга жавобан Эрон Иорданиядаги Қўшма Штатларнинг ҳарбий базаларига ракета ҳужуми уюштирган.