АҚШ Сурияга 5 млн долларлик ўғирланган осори-атиқаларни қайтарди
АҚШ Сурияга 5 млн долларлик ўғирланган осори-атиқаларни қайтарди
АҚШ расмийлари 23-сентябр куни Сурияга ўғирланган 36 та қадимий осори-атиқани қайтариб берганини билдирди. Улар орасида ИШИД террорчилари Палмирадаги қадимий обидаларни вайрон қилаётган пайтда ноқонуний олиб чиқиб кетилган бир тош ҳам бор.
Маълум қилинишича, умумий қиймати 5 миллион доллардан ортиқ бўлган бу буюмлар Ню Ёркдаги Метрополитен санъат музейи ҳамда бир нечта коллексионерлардан мусодара қилинган. Манхеттен округ прокурори Алвин Браггнинг айтишича, маданий меросни асраш ҳар қандай чегара ва миллат тушунчасидан устун туради.
Маълумотларга кўра, оғирлиги 450 килограммдан ошадиган оҳактош ЮНЕСКО Бутунжаҳон мероси рўйхатига киритилган Палмира шаҳридан олиб чиқиб кетилган. Кейинчалик, 2015–2017-йилларда ИШИД аъзолари ушбу қадимий шаҳарнинг катта қисмини портлатиб, йўқ қилиб ташлаган эди.
Бу йўнилган тош ҳайкалда ётган эркак ҳамда унинг атрофидаги аёл ва уч нафар бола тасвирланган.
Суриянинг Вашингтондаги муваққат ишлар вакили Муҳаммад Қанатрий бу қадам икки мамлакат ўртасида маданий меросни ҳимоя қилиш борасидаги алоқаларни мустаҳкамлашини айтди.
“Сурия ва АҚШ ҳамкорлиги ҳамда Манхеттен округ прокуратураси саъй-ҳаракатлари эвазига Сурия тарихининг бир қисми ниҳоят ўз уйига қайтмоқда”, деди у.
Қайтарилган осори-атиқаларнинг тўрттаси америкалик коллексионер Майкл Стейнхардтдан тортиб олинган. У 2021-йилда АҚШ ҳукумати билан тузилган битим доирасида дунё бўйлаб ўғирланган, умумий қиймати 70 миллион долларга тенг 180 га яқин экспонатни топширганди.
Метрополитен музейидан мусодара қилинган 13 та буюм эса прокуратура томонидан 2017-йилдан бери ушбу муассасадан олиб қўйилган 98,7 миллион долларлик 402 та осори-атиқа қаторига киради.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.