АҚШ суди Ўзбекистон фуқароларига ҳам тааллуқли виза чекловини бекор қилди

АҚШ суди Ўзбекистон фуқароларига нисбатан қўлланилган виза чекловини бекор қилди.

АҚШ федерал суди Ўзбекистон ва яна 74 та давлат фуқароларига иммиграцион виза беришни тўхтатиш ҳақидаги қарорни бекор қилди. Бу ҳақда Реутерс агентлиги хабар берди.

Манхеттендаги федерал судя Жаннет Варгас Давлат департаменти сиёсатини "очиқдан-очиқ ноқонуний" деб баҳолади. Унинг 61 саҳифалик қарорида давлат котиби Марко Рубио бундай чекловни жорий этиш орқали ўз ваколатидан четга чиққани қайд этилган.

АҚШ Давлат департаменти 14-январ куни 75 та давлат фуқаролари учун иммиграцион визалар беришни вақтинча тўхтатишини маълум қилган эди. Чеклов 21-январдан кучга кирган эди. Жорий қилинган чеклов Ўзбекистон, Қозоғистон, Қирғизистон, Россия, Эрон, Покистон, Бразилия ва яна ўнлаб давлатлар фуқароларига тааллуқли эди.

Трамп маъмурияти ушбу мамлакатлардан келадиган айрим иммигрантлар АҚШга боргач, давлат ёрдами ва ижтимоий дастурларга қарам бўлиб қолиши мумкинлигини важ қилиб кўрсатган.

Бироқ судга кўра, ҳар бир аризачининг ҳолати алоҳида баҳоланиши керак. Давлат департаментининг ички кўрсатмасида ҳатто ўзини АҚШ учун "молиявий юк" бўлмаслигини тасдиқловчи қўшимча ҳужжатлар тақдим этган аризачиларга ҳам виза бермаслик талаб қилинган. Суд айнан шу ёндашувни қонунга зид деб топган.

Қарор билан фақат ушбу чекловга асосланиб берилган рад жавоблари бекор қилинади. Бу минглаб эски виза аризалари қайта кўриб чиқилиши мумкинлигини англатади.

Июн ойида федерал суд Трампнинг Ҳ-1Б ищи визалари учун 100 минг долларлик йиғим жорий этиш қарорини бекор қилган эди. Суд президент Конгресс ваколатига кирувчи иммиграция тўловларини бир томонлама белгилай олмаслигини қайд этган.