АҚШ сенаторлари Трампни Путинни Г20 саммитига таклиф қилиш қароридан воз кечишга чақирди
АҚШ сенаторлари Трампни Путинни Г20 саммитига таклиф қилиш қароридан қайтишга чақирди
АҚШнинг Демократик ва Республикачилар партияларидан 14 нафар сенатор президент Доналд Трампдан декабр ойида Маямида бўлиб ўтадиган Г20 саммитида қатнашиш учун Владимир Путинга юборилган таклифни бекор қилишни сўради.
Сенаторлар ўз мактубида Путин Россиянинг Украинага қарши кенг кўламли уруши учун асосий жавобгар эканини қайд этди.
“Унинг АҚШда ўтказиладиган Г20 саммитида иштирок этишига йўл қўйиш жиддий хавотир уйғотади, чунки бу Украинадаги фуқаролик обьектларига ҳар куни зарба бераётган ҳукумат билан муносабатларни меъёрий ҳолга айлантириши мумкин”, дейилади мактубда.
Сенаторлар фикрича, агар Путин халқаро ҳамжамиятдан яккалаб қўйилмаса, уни ўт очишни тўхтатишга ундайдиган жиддий сабаб деярли қолмайди.
Мактуб республикачи сенатор Рожер Уикер ва демократ Жин Шейхин ташаббуси билан ёзилган. Мурожаатни улардан ташқари яна олти нафар демократ ва олти нафар республикачи сенатор имзолаган.
23-сентябр куни АҚШ давлат котиби Марко Рубио Қўшма Штатлар Владимир Путинни Маямида бўлиб ўтадиган Г20 саммитига таклиф қилганини айтганди. Кремл эса таклиф учун миннатдор эканини, бироқ Путиннинг АҚШга бориши бўйича якуний қарор ҳали қабул қилинмаганини билдирди.
Август охирида Россия молия вазири Антон Силуанов уруш бошланганидан бери илк бор Г20 мамлакатлари молия вазирлари ва марказий банк раҳбарлари саммитида иштирок этди. Россия томонини учрашувга жалб қилиш қарори Трамп маъмурияти томонидан қабул қилинган. Россия вазирининг ташрифи Европа делегациялари норозилигига сабаб бўлди.