АҚШ Россияга санксияларни юмшатиш шартини маълум қилди
АҚШ молия вазири Скотт Бессент россиялик ҳамкасби Антон Силуановга Украинадаги уруш якунланмагунча Москва иқтисодий босимнинг юмшатилишини ёки бошқа масалалар бўйича келишувларга эришилишини кутмаслиги кераклигини айтди. Бу ҳақда Реутерс манбасига таяниб хабар берди.
АҚШ Россияга нисбатан санксияларни бекор қилиш учун шартларни э'лон қилди.
Реутерс агентлигининг 1-сентабрга ўтар кечаси музокаралар мазмунидан хабардор манбага таяниб ёзишича, Бессент Силуановга Россия Украинадаги уруш тугамагунча иқтисодий босимнинг юмшатилишини кутмаслиги кераклигини билдирган. Шунингдек, Вашингтон уруш якунлангунига қадар бошқа масалалар бўйича ҳам Москва билан алоҳида келишувлар тузиш ниятида эмаслиги айтилган.
Силуановнинг Г20 доирасидаги учрашувда иштирок этиши айрим Европа давлатлари вакилларининг эътирозига сабаб бўлган. Реутерс қайд этишича, Европа мамлакатлари айни пайтда Украинадаги уруш туфайли Россияга нисбатан санксияларни кучайтириш устида ишламоқда. Хусусан, Германия молия вазири ва вице-канслери Ларс Клингбайл Силуановнинг бундай тадбирда қабул қилинишини «ташвишли сигнал» деб атаган. У Россия молия вазири иштирок этган тақдирда Г20 вакилларининг анъанавий умумий суратига тушишдан бош тортишини ҳам билдирган.
Клингбайлнинг айтишича, Россия билан очиқ мулоқот қилиш, уруш юзасидан танқидий фикрларни билдириш мумкин, аммо ҳозирги шароитда Силуанов билан биргаликда умумий суратга тушиш у учун «ҳаддан ташқари катта қадам» бўлар эди. Германия вазирига Европанинг бошқа мамлакатлари вакиллари ҳам қўшилган ва якунда умумий сурат Россия молия вазирисиз олинган. Клингбайл, шунингдек, Г20 иштирокчиларининг эрталабки умумий йиғилишида Силуановга Украинадаги урушни тугатиш зарурлигини айтганини ва Берлиннинг Киевни қўллаб-қувватлашини яна бир бор тасдиқлаганини маълум қилди.
Россия Молия вазирлиги эса 31-август куни Бессент ва Силуанов ўртасидаги учрашув бўйича қисқа баёнот берган. Унда томонлар Россия-АҚШ молиявий ҳамкорлиги ҳамда Г20 доирасидаги ўзаро алоқаларни муҳокама қилгани айтилган. Россия томони баёнотида санксиялар ёки Украинадаги уруш билан боғлиқ шартлар ҳақида маълумот келтирилмаган.
Айни пайтда СНБС АҚШ Молия вазирлиги маълумотларига таяниб, Бессент ва Силуанов Ашвиллда АҚШ президенти Доналд Трампнинг Украина бўйича «тинчлик режаси»ни ҳам муҳокама қилганини хабар қилди.