АҚШ разведка раҳбари Москвага Россия, Украина ва АҚШ президентлари иштирокида учрашув ўтказишни таклиф қилган — Ахиос
Деуцче Велле хабарига кўра, Ахиос икки манбага таяниб маълум қилишича, АҚШ Марказий разведка бошқармаси (МРБ) директори Жон Ретклифф Москвага яқинда қилган ташрифи чоғида АҚШ, Россия ва Украина президентлари – Доналд Трамп, Владимир Путин ва Владимир Зеленский иштирокида уч томонлама учрашув ўтказишни таклиф қилган.
Нашрнинг қайд этишича, бу Ретклиффнинг Украинадаги тинчликка эришиш бўйича дипломатик саъй-ҳаракатларда шахсан иштирок этган биринчи ҳолати бўлган.
Ретклиффнинг Москвага ташрифи давомида асосий вазифаларидан бири Россия махсус хизматлари раҳбарияти Владимир Путинни Украина билан музокараларни қайта бошлашга ишонтира оладими ёки йўқми, деган масалани аниқлаш бўлган. Ахиос суҳбатлашган манбаларининг таъкидлашича, Ретклифф Россия Федерал хавфсизлик хизмати (ФСБ) директори Александр Бортниковни конструктив позицияга эга ва дипломатик саъй-ҳаракатларни қайта бошлашга ёрдам бера оладиган шахс деб баҳолаган.
АҚШ расмийлари Украина президенти Владимир Зеленскийга Ретклиффнинг Москвадаги музокаралари ва уч томонлама саммит ўтказиш таклифи ҳақида маълумот берган. Трамп маъмурияти аввал ҳам бундай музокара форматини таклиф қилган, бироқ Владимир Путин бу таклифни рад этган.
**МРБ раҳбарининг Москвага ташрифи нима мақсадда бўлган?**
Жон Ретклифф 25-август куни АҚШ Ҳарбий-ҳаво кучларига тегишли Боеинг С-17 Глобемастер ИИИ ҳарбий-транспорт самолётида Россияга учиб келган ва бир неча соат ўтиб мамлакатни тарк этган. Ташриф шу қадар махфий ташкил этилганки, Оқ уйнинг айрим юқори мартабали амалдорлари ҳам Ретклиффнинг Москвага сафаридан бехабар бўлган.
Ташрифнинг асосий мақсадларидан бири Россия томонига АҚШнинг НАТОдаги иттифоқчиларига ҳужум қилишни “йўл қўйиб бўлмайдиган ҳолат” деб ҳисоблашини етказиш бўлгани маълум қилинган. Ретклифф Москвадаги учрашувда ФСБ раҳбари Александр Бортниковга Россиянинг Украинадаги урушдаги ҳолати юзасидан “салбий баҳосини” билдирган. МРБ директори, шунингдек, Россиянинг ҳарбий ва иқтисодий аҳволи янада ёмонлашишидан олдин Москва Украина билан музокараларни бошлаши кераклигини таъкидлаган.