АҚШ Путинни Маямида ўтказиладиган Г20 саммитига таклиф қилди

АҚШ Путинни Маямида бўладиган Г20 саммитига таклиф қилди

Россия президенти Владимир Путин 14–15-декабр кунлари Маямида ўтказиладиган Г20 саммитига таклиф этилган. Бу ҳақда АҚШ давлат котиби Марко Рубио журналистлар саволларига жавоб берар экан маълум қилди.

“Фикримизча, бу унга нафақат АҚШ президенти, балки бошқа жаҳон етакчилари билан ҳам мулоқот қилиш имконини беради. Таклиф қабул қилинади, деган умиддамиз”, деди Рубио.

Унинг айтишича, агар одамлар фақат ўзлари билан бир хил фикрлайдиганлар билан учрашса, бундай учрашувлар шубҳасиз жуда ёқимли кечади, аммо муаммоларни ҳал қилиш нуқтаи назаридан ҳеч нарсани ўзгартирмайди.

“Муаммоларни ҳал қилиш учун сиз билан бир хил фикрламайдиганлар билан ҳам кўришиш керак”, деди АҚШ давлат котиби.

Москва энергетика секторига ўт очишни тўхтатишдан манфаатдор-ми, деган саволга Рубио шундай жавоб берди:

“Менимча, ҳар икки томон дон ва энергетика соҳаларини қамраб оладиган маълум даражада чекланган сулҳга қизиқиш билдирган. Бу уруш муаммосини ҳал қилмайди, бироқ ҳозирги глобал кескинликни маълум даражада юмшатишга ёрдам бериши мумкин, деб ўйлайман”.

Бундан икки кун олдин Блоомберг Путин Хитойда бўлиб ўтадиган Осиё-Тинч океани иқтисодий ҳамкорлиги (АПЕС) саммитида қатнашишни режалаштираётгани, аммо Г20 саммитига бормаслиги мумкинлигини ёзганди. Агентлик манбалари Путиннинг Маямидаги саммитда Трамп билан учрашиш эҳтимолини “ниҳоятда паст” деб баҳолаган.

Путин Доналд Трамп билан сўнгги марта 2025-йил 15-августда Аляскада учрашган. Бу Россиянинг Украинага кенг кўламли босқини бошланганидан бери уларнинг ягона юзма-юз учрашуви бўлди. Учрашувдан кейин аҳамиятга молик натижалар эълон қилинмади.

Ўз навбатида Украина президенти Владимир Зеленский урушни тугатиш масаласини муҳокама қилиш учун Путин билан шахсан учрашишга тайёрлигини бир неча бор билдирган. Кремл эса бундай учрашув фақат Москвада ўтказилиши мумкинлигини айтиб келади.