АҚШ президенти Ўзбекистон халқини Мустақиллик куни билан табриклади
АҚШ Президенти Доналд Трамп Ўзбекистон халқини Мустақиллик байрамининг 35 йиллиги билан қутлади. Бу ҳақда Президент матбуот хизмати 31-август куни маълум қилди.
Табрикда Америка халқи номидан Президент Шавкат Мирзиёев ва Ўзбекистон халқига самимий тилаклар билдирилган. Унда АҚШ ва Ўзбекистон ўртасидаги стратегик шерикликнинг кенгайиб бораётгани алоҳида таъкидланган.
"Ушбу шонли сана Ўзбекистоннинг бой тарихи ва юксак маданиятини яна бир бор ёдга олиш учун муҳим ва айни муддао бўлган фурсатдир. Ўзбекистон муҳим ва манзилли ислоҳотларни амалга ошираётгани сари стратегик шериклигимиз ҳам изчил равишда кенгайиб, ривожланиб бормоқда", дейилади мактубда.
Доналд Трампнинг қайд этишича, ўтган йилда икки давлат ўртасида чегаралар хавфсизлигини таъминлаш, савдо ва инвестициялар, энергетика ҳамда минтақавий боғлиқликни кенгайтириш бўйича салмоқли ишлар амалга оширилган.
"Қўшма Штатлар ҳамкорликнинг янги йўналишларини ўрганар экан, икки томонлама муносабатларимизни янада мустаҳкамлашдан умидвордир. Мустақиллик байрамини нишонлар экансиз, сизга ва Ўзбекистон халқига энг эзгу тилакларимни билдираман", деб ёзилган табрик мактубида.
Шунингдек, Мустақиллик куни муносабати билан Россия Президенти Владимир Путин ҳам табрик хати йўллаган эди.