АҚШ президенти Ҳормузни Трамп бўғози деб атамоқчи

АҚШ президенти Доналд Трамп 2-сентябр куни Ҳормуз бўғозини "Трамп бўғози" деб номлашни таклиф қилди. Бу таклиф Эрон билан давом этаётган зиддиятлар фонида илгари сурилди, деб хабар берди Ал Арабия.

Трамп ўзининг Трутҳ Сосиал саҳифасида шундай ёзди: "Бу ҳудуд АҚШ назоратида. Ҳормуз бўғози номини Трамп бўғози деб ўзгартириш керакдир??? Америка каби бу ном ҳам ҳудуд аҳамияти ва мавқейини оширади".

Бу Трамп томонидан таклиф қилинган географик номларни ўзгартириш бўйича навбатдаги ташаббусдир. Ўтган ҳафта у Канада билан савдо уруши сабабли Онтарио кўлини "Америка кўли" деб аташни буюрган эди.

Шунингдек, Трамп 2025-йил январ ойида лавозимига қайтганининг биринчи кунида Мексика кўрфазини "Америка кўрфази" деб қайта номлаган эди. Бироқ, на Мексика, на Канада бу ўзгаришларни тан олмаган.

80 ёшли АҚШ президенти дастлаб бу ном ўзгартириш таклифларини ҳазил тариқасида илгари сурган бўлса-да, кейинчалик уларни амалга оширишга киришган. Сўнгги ҳафталарда Трамп Ҳормуз бўғозига эгалик қилиш билан тез-тез таҳдид қилиб келмоқда. У ҳатто бу сув йўлини "АҚШнинг янги ҳудуди" деб кўрсатилган харитани ҳам тақдим этган.

Аммо Эрон бу муҳим йўлни ёпиб қўйган. Дунё нефтининг бешдан бир қисми шу йўл орқали ўтади. Эрон бу ҳаракатни Трамп феврал ойи охирида Исроил билан бирга бошлаган урушга жавобан амалга оширган.

2-сентябрга ўтар кечаси АҚШ кучлари Ҳормуз бўғози яқинига навбатдаги зарбалар берди. Трампнинг сўзларига кўра, Эрон бу ерга янги миналар жойлаштиришга уринаётгани учун зарба берилган. Шундан сўнг нефт нархи яна кўтарила бошлади.

**Эронга қарши янги ҳарбий ҳаракатлар узоқ давом этмайди**

Трамп 2-сентябр куни Эронга қарши янги ҳарбий ҳаракатлар жуда узоқ давом этмаслигини билдирди. У Овал кабинетда журналистларга Эрон миналарни ташлайдиган ракета ясашга уринаётганини ва АҚШ уни йўқ қилганини айтди.

Шунингдек, у Эрон радарлар ҳамда ракета тизимларини тиклашга уринаётганини, АҚШ зарбалари буларга ҳам қаратилганини маълум қилди.

"Биз уларнинг Ҳормуз бўғози бўйлаб қуришга ғайрат қилган барча янги ускуналарини йўқ қилдик. Уларнинг баъзилари мудофаа, баъзилари эса ҳужум учун эди... Кеча тунда жуда кучли ҳужум уюштирилди. Агар хоҳласак, исталган вақтда шундай ҳужумни такрорлашга тайёрмиз", деди у.