«АҚШ президенти администрацияси Жексон-Вэник тузатишини бекор қилиш тарафдори» — Марко Рубио
АҚШ президенти администрацияси Марказий Осиёнинг тўртта мамлакатига, жумладан Ўзбекистонга нисбатан қўлланишда давом этаётган Жексон-Вэник тузатишини бекор қилиш тарафдори. Бу масаланинг ҳал этилиши Конгрессга боғлиқ, деди АҚШ давлат котиби Марко Рубио.
«АҚШ президенти администрацияси Жексон-Вэник тузатишини бекор қилиш тарафдори» — Марко Рубио
АҚШ президенти администрацияси Жексон-Вэник тузатишини бекор қилишни қўллаб-қувватлайди. Бу ҳақда 19 октябрь куни Регистон майдонига ташрифи чоғида АҚШ давлат котиби Марко Рубио журналистларга маълум қилди. У бир кун аввал C5+1 форматидаги вазирлар учрашувида ҳамда Америка-Ўзбекистон бизнес ва инвестиция кенгашининг иккинчи йиғилишида иштирок этиш учун Самарқандга келган эди.
«Биз унинг бекор қилиниши тарафдоримиз. АҚШ Конгрессида бундай қарорнинг нуфузли тарафдорлари кам эмас. Сенатда номзодимни тасдиқлаш бўйича эшитувлар пайтида ҳам мендан бу ҳақда сўрашган эди ва мен бекор қилинишини қўллаб-қувватлашимни айтгандим. Администрация [АҚШ президенти Дональд Трампники] ҳам бунга чақирмоқда. Конгресс ҳозирча шунчаки бу масалага етиб келмади, лекин бу содир бўлади деб умид қиламиз», — деди Рубио.
Жексон-Вэник тузатиши Марказий Осиёнинг бешта мамлакатидан тўрттасига, жумладан Ўзбекистонга нисбатан ҳамон амал қилмоқда. Марказий Осиё халкаро институти директори Жавлон Ваҳобов аввалроқ «Газета»га маълум қилганидек, АҚШнинг иккала партияси администрациялари уни қайта кўриб чиқишни қўллаб-қувватлаган, бироқ якуний қарор учун Конгресснинг иккала палатаси розилиги талаб қилинади.
Унинг сўзларига кўра, тузатиш савдога тўсқинлик қилмайди: Ўзбекистон АҚШ билан нормал савдо муносабатлари режимидан фойдаланиб келмоқда, аммо у шартли бўлиб қолмоқда ва ҳар йили қайта кўриб чиқилади. Бу режимнинг доимий асосда мустаҳкамлаб қўйилиши маъмурий процедураларни камайтириш ҳамда савдо ва узоқ муддатли инвестициялар учун шароитларнинг олдиндан аниқ бўлишини ошириш имконини берар эди.
Жавлон Ваҳобов иккала партиядан бўлган қонун чиқарувчилар Сенат ва Вакиллар палатасига тузатишни қўллашни тўхтатиш ва доимий нормал савдо муносабатларини ўрнатиш тўғрисидаги қонун лойиҳаларини киритганини таъкидлади. У сиёсий қўллаб-қувватлаш ва қонуннинг қабул қилиниши ўртасидаги узилишни асосий тўсиқ деб атади: бунинг учун қонун чиқарувчиларнинг кенг коалицияси ва масаланинг Конгрессда устувор равишда кўриб чиқилиши керак.