AҚШ полицияси қуриётган сув омборидан бочкада топилган эркакнинг қолдиқлари шахсини аниқлади

АҚШ полицияси сатҳи пасайиб бораётган сув омборидаги бочкадан топилган эркакнинг шахсини аниқлади

Кўп йиллик суриштирувлардан сўнг, Невада полицияси Лас-Вегас яқинида занглаган бочка ичига жойлаб кетилган шахснинг қолдиқлари кимга тегишли эканини аниқлади.

Полициянинг билдиришича, бу эркак Эдвард "Бадди" Лелбуриан Жексон бўлган. У 2022 йилнинг май ойида бошидан олинган ўқ жароҳати билан топилган эди. Занглаган бочка кучли қурғоқчилик сабабли Мид кўлида сув сатҳи пасайганидан кейин юзага чиққан.

Лас-Вегас метрополитен полиция департаментига кўра, терговчилар ДНК орқали унинг оиласини топмагунича, унинг шахси яқингача номаълум бўлиб қолаётган эди.

Департаментнинг қотиллик ишлари бўйича детективи Роберт Прайснинг айтишича, жамоатчилик орасида бу қотиллик мафия билан боғлиқ деган тахминлар бўлса-да, ўлимнинг бирор бир маълум жиноий гуруҳга алоқадорлигини кўрсатувчи далиллар йўқ.

"Терговимизнинг ушбу босқичида бизда бу назарияларни тасдиқлайдиган маълумотлар мавжуд эмас", деди Прайс.

Прайснинг сўзларига кўра, Жексон 1980-йилларда бошига отилган ўқдан вафот этган деб ҳисобланмоқда. У ўлганида тахминан "50 ёшларнинг ўртаси ёки охирида" бўлган. У асли Арканзас штатидан бўлиб, АҚШ Ғарби бўйлаб саёҳат қилиб юриши билан танилган. Расмийларнинг айтишича, у Калифорния ва Юта штатларида ҳам яшаган.

У бошидан олинган ягона ўқ жароҳати билан топилган. Прайс пайшанба кунги матбуот анжуманида уни ўлдирган ўқ топилмаганини ва бочка ичидан у эгнида бўлган кийимлардан ташқари ҳеч нарса чиқмаганини айтди.

У илгари Юта штатининг Солт-Лейк-Сити шаҳрида ҳибсга олинган эди. Прайснинг қўшимча қилишича, унинг Лас-Вегас билан маълум бир алоқаси бўлмаган ва у ҳеч қачон бедарак йўқолган деб рўйхатга олинмаган.

Унинг Арканзасдаги узоқ қариндошлари полицияга унинг тез-тез жой олаштириб юришини айтишган.

"У мамлакат бўйлаб саёҳат қиларди. Қачон хоҳласа, ўшанда пайдо бўларди", деб тушунтирди Прайс.

Полиция ҳали ҳам унинг қотилини аниқлаш ва отишма сабабини аниқлашга ҳаракат қилмоқда. Прайс Жексоннинг "қиморбоз" сифатида танилмаганини айтди ва унинг тирик қолган ҳамкорларини топиш қийин бўлиши мумкинлигини қўшимча қилди.

АҚШнинг энг йирик сув омбори бўлмиш Мид кўли Лас-Вегасдан Лос-Анжелесгача бўлган 20 миллион аҳолини ичимлик суви билан таъминлайди.

Полиция аввалроқ қурғоқчилик шароитида кўл чекингани сайин яна бошқа мурдалар топилиши мумкинлигидан огоҳлантирган эди. Ичидан яна уч киши топилган ва расмийлар томонидан уларнинг шахси ижобий аниқланган. Икки киши чўкиб кетган деб ҳисобланади, учинчи ўлимнинг сабаби эса номаълумлигича қолмоқда.

Полиция унинг қолдиқларини аниқлаш ҳаракатларининг бир қисми сифатида жабрланувчи бош суягининг 3D моделини яратган эди.

Мид кўлида сув сатҳи 2000 йилдан бери пасайиб бормоқда ва сўнгги йилларда қурғоқчилик ёмонлашди, олимлар бунга иқлим ўзгариши сабаб бўлаётганини айтмоқда.

Сўнгги йилларда қурғоқчилик кучайиб бормоқда, олимлар бунга иқлим ўзгариши сабаб бўлаётганини таъкидлашади.

Давом этаётган иссиқ ёз об-ҳавоси бир қанча мамлакатлардаги дарё ва кўлларда сув сатҳининг пасайишига олиб келди ва бу кутилмаган топилмаларга сабаб бўлди.

Венгрияда шу йил бошида Будапештдаги Дунай дарёсидан Иккинчи жаҳон урушида ҳалок бўлган икки нафар немис аскарининг мурдаси топилди. Қолдиқлар ёнида Германия армияси Вермахтнинг деярли шикастланмаган мотоцикли ҳам бор эди.

Яқинда Дунайда Иккинчи жаҳон урушининг бошқа қолдиқлари, жумладан, Сербиянинг Прахово яқинида парчаланиб кетган кема корпуси пайдо бўлди.