АҚШ МРБ директори Жон Ретклифф уруш бошланганидан буён илк бор Москвага борди
Бу МРБ раҳбарининг 2021-йилдан бери Москвага илк ташрифидир. Ўшанда Россия қўшинларининг Украина чегаралари яқинига тўпланиши фонида идоранинг аввалги раҳбари Уилям Бёрнс Москвага борган эди.
АҚШ Марказий разведка бошқармаси (МРБ) директори Жон Ретклифф уруш бошланганидан буён илк бор Москвага эълон қилинмаган ташриф билан борди.
У 25-август куни эрталаб Ригадан АҚШ Ҳарбий-ҳаво кучларига тегишли Боеинг С-17 ҳарбий-транспорт самолётида учиб, "Внуково" аеропортига қўнди. Тахминан соат 19:00 да Ретклиффни олиб келган Америка самолёти Москвадан ортга учиб кетгани маълум бўлди.
Бу МРБ раҳбарининг 2021-йилдан бери Москвага биринчи ташрифидир. Ўшанда Россия қўшинларининг Украина чегаралари яқинига тўпланиши фонида идоранинг аввалги раҳбари Уилям Бёрнс Москвага борган эди. Ретклиффнинг бу сафарги ташрифи – АҚШ маъмурияти вакилининг Россияга 2026-йил январидан буён амалга оширган биринчи ташрифидир.
Ретклифф ташрифининг мақсадлари номаълум. МРБ раҳбарининг сафари ҳақида расман хабар берилмади. Кремл эса "Внуково"даги Америка самолёти ҳақида гўёки ҳеч нарса билмаслигини ва бу ҳафта Америка маъмурияти вакиллари билан учрашувлар режалаштирилмаганини маълум қилди. Кремл мухбири Александр Юнашевнинг сўзларига кўра, Ретклиффнинг ташрифи туфайли Владимир Путин ўз иш жадвалини ўзгартириб, 25-августга режалаштирилган йирик тадбирни бекор қилган. Ахиосънинг таъкидлашича, Ретклифф музокаралар учун борган. Ким билан ва нима ҳақида экани номаълум.
Версиялардан бирига кўра, унинг ташрифи Россияда судланган америкалик Чарлз Зиммерманнинг озод этилиши билан боғлиқ бўлиши мумкин. Бу ҳақда Ксения Собчак ўз Телеграм-каналида ахборот манбасини кўрсатмаган ҳолда ёзган. Агар шундай бўлса, Зиммерман бир ой ичида Россия ҳукумати томонидан авф этилиб, ватанига қайтарилган иккинчи АҚШ фуқароси бўлади. Биринчиси Роберт Гилман эди. Унинг маҳбуслар алмашинувисиз қайтарилиши Москва ва Киев ўртасида Америка томони иштирокидаги тинчлик музокараларининг янги босқичига эҳтимолий тайёргарлик сифатида кўрилганди.
Бошқа бир версияга кўра, Ретклифф Москвада қандайдир "муҳим операция"ни муҳокама қилган. Бу ҳақда Украина президенти девони раҳбари Кирилл Будановга яқин бўлган Украине Сонтехт Телеграм-канали хабар тарқатди. Канал муаллифлари гап "бир мунча вақт махфийлик режимида тайёрланган" ва "натижалари кейинги жараёнлар учун жиддий аҳамият касб этиши мумкин" бўлган операция ҳақида кетаётганини даъво қилмоқда.
Учинчи версия – Ретклифф Путинга "огоҳлантириш" етказиш учун борган. Бундай версияни Тҳе Валл Стреет Жоурнал илгари сурди. Газетанинг маълумотларига кўра, АҚШ разведкаси Россия Украина билан урушни давом эттириш учун сафарбарликка тайёргарлик кўра бошлагани ва алянсга аъзо мамлакатларга қарши провокация уюштириб, "НАТО қатъиятини синаб кўришни" режалаштираётгани мумкинлиги ҳақида маълумот тўплаган. Нашр, шунингдек, ташриф АҚШ ва Эрон ўртасидаги уруш билан боғлиқ бўлиши мумкинлигини ҳам тахмин қилмоқда. Россия Теҳроннинг иттифоқчиси ҳисобланади. Бир кун аввал Вашингтон душманига қарши янги иқтисодий босим кампаниясини эълон қилган эди.