АҚШ Миллий разведкасига янги директор тайинланди
АҚШ Сенати Ню-Ёрк жанубий округи федерал прокурори Жьей Клейтонни Миллий разведка директори лавозимига тасдиқлади. Унинг номзодини 51 нафар сенатор қўллаб-қувватлади, 47 нафар сенатор, жумладан, барча демократлар қарши овоз берди.
АҚШ Миллий разведкаси янги раҳбарга эга бўлди: 28-июл куни бўлиб ўтган овоз бериш натижасида Жьей Клейтон ушбу лавозимга расман тасдиқланди. Унинг номзоди июн ойида Президент Доналд Трамп томонидан Сенатга тақдим этилган эди.
АФП агентлигининг хабар беришича, дастлаб демократлар Клейтонни Миллий разведка раҳбари вазифасини вақтинча бажарувчи Уилям Пултега нисбатан мақбулроқ вариант деб ҳисоблашган. Бироқ Сенатдаги эшитувлар давомида уларнинг фикри ўзгарган. Хусусан, демократ сенаторлар Клейтондан 2020-йилги президентлик сайловида Жо Байденнинг ғалабасини тан оладими, деб бир неча бор сўрашган. Клейтон Байденнинг сайлов ғолиби сифатида "эътироф этилганини" таъкидлаган, аммо тўғридан-тўғри жавоб беришдан ўзини тийган. Доналд Трамп бир неча йилдан буён ушбу сайлов натижалари сохталаштирилганини даъво қилиб келади, аммо бу иддаоларни тасдиқловчи далиллар мавжуд эмас.
Жьей Клейтон 2025-йилдан бери Ню-Ёрк жанубий округи федерал прокурори лавозимида ишлаган. У бир қатор шов-шувли ишларга раҳбарлик қилган, жумладан, Венесуеланинг собиқ раҳбари Николас Мадурога нисбатан гиёҳванд моддалар ноқонуний айланмаси бўйича терговни назорат қилган.
Шунга қарамай, Клейтоннинг разведка ёки миллий хавфсизлик соҳасида амалий тажрибаси йўқ. Энди у АҚШнинг 18 та идорадан иборат разведка ҳамжамиятини бошқаради. Бу тизимга Марказий разведка бошқармаси (СИА), Миллий хавфсизлик агентлиги (НСА) ва Мудофаа вазирлиги разведка бошқармаси (ДИА) каби ташкилотлар киради.
Аввалги Миллий разведка директори Тулси Габбард май ойида турмуш ўртоғининг оғир касаллиги туфайли лавозимини тарк этган эди. Шундан сўнг Доналд Трамп вазифани вақтинча Уилям Пултега юклаган. Аммо унинг разведка соҳасида тажрибаси етарли эмаслиги икки партия вакиллари томонидан танқид қилинган.
АФП маълумотларига кўра, Пулте қисқа муддатли раҳбарлиги даврида Доналд Трампнинг айрим сиёсий рақибларига нисбатан жиноий таъқиб масаласини кўриб чиқиш учун материаллар юбориш ташаббуси билан чиққан ҳамда Миллий разведка директори аппаратида кенг кўламли қисқартиришларни амалга оширган. Унинг маълум қилишича, бешинчи босқич қисқартиришлардан кейин идора марказий аппарати ходимлари сони қарийб 30 фоизга камайтирилади.
Жьей Клейтон илгари АҚШ Қимматли қоғозлар ва биржалар комиссияси (СЕС) раиси сифатида ҳам ишлаган. Шунингдек, у Сулливан & Сромвелл юридик фирмасида фаолият юритиб, ҳуқуқ соҳасида катта тажриба орттирган.