АҚШ Мадуро ва унинг рафиқасига янги айбловлар қўйди
АҚШ Адлия вазирлиги Венесуеланинг собиқ президенти Николас Мадуро ва унинг рафиқасига қийноқлар қўллаш ва мухолифат овозини бостириш бўйича янги айбловларни эълон қилди. Прокурорларга кўра, бу зўравонликлар Мадуронинг топшириғи билан қилинган. Улар Ню Ёркдаги изоляторда сақланмоқда.
АҚШ Мадуро ва унинг рафиқасига янги айбловлар қўйди
АҚШ Адлия вазирлиги Венесуеланинг собиқ президенти Николас Мадуро ва унинг рафиқаси Силия Флоресга қарши янги айбловларни илгари сурди. Мамлакат расмийлари уларни қийноқларни қўллаш мақсадида тил бириктирганликда айбламоқда, деб хабар берди.
Янги айбловлар Манҳеттен федерал судига топширилди. 30 саҳифалик ҳужжатга кўра, Мадуро, унинг рафиқаси ва Венесуеланинг юқори мартабали мулозимлари 1999-йилдан 2025-йилгача бўлган даврда ўз ҳокимиятини сақлаб қолиш ва мухолифат овозини ўчириш учун одамларга “жисмоний ҳамда маънавий азоб-уқубатлар етказиб келган”.
Америкалик прокурорлар маълумотига кўра, бевосита Мадурога бўйсунган Венесуеланинг юқори мартабали офицерларидан бири қийноқ усулларини ишлаб чиққан ва уларни давлат раҳбари шахсан тасдиқлаган. Яна бир мулозим эса Мадуронинг ҳокимиятда қолишига таҳдид деб кўрилган тинч аҳоли ва ҳарбийларга (жумладан, АҚШ фуқароларига ҳам) нисбатан қийноқ қўллаш ҳақида шахсан буйруқ берган.
Ҳужжатда, шунингдек, 2013-йилда Мадуро давлат тўнтаришини тайёрлашда гумон қилинган венесуелалик ҳарбий хизматчини ҳибсга олишга буйруқ бергани қайд этилади. Ҳарбий контрразведка ходимлари сўроқ пайтида қўлга олинган шахсга салкам 20 марта электр токи билан зарба берган, шунингдек, уни қўл ва оёқларидан осиб қўйган.
Мадуро ва Флореснинг 2027-йил июн ойида бошланиши режалаштирилган суди олдидан уларнинг адвокатлари “суверен дахлсизлик” важидан келиб чиқиб, ишни бекор қилишни талаб қилмоқда. Бироқ судя Элвин Ҳеллерштейн бу илтимосномаларни ҳали кўриб чиқмаган, шунингдек, Флореснинг соғлиғи сабабли гаров эвазига озодликка чиқиш бўйича илтимосини ҳам рад этган.
Шу билан бирга, Венесуеланинг амалдаги муваққат президенти Делси Родригес ҳукуматни Мадуро тарафдорларидан тозалаб, унинг асосий сафдоши Алекс Саабни АҚШга экстрадиция қилди, пул ювиш бўйича айбига иқрор бўлган Сааб Мадурога қарши асосий гувоҳга айланиши кутилмоқда.
Эслатиб ўтамиз, 2026-йил 3-январда АҚШ Николас Мадуро ва унинг рафиқаси Силия Флоресни Венесуеладан олиб чиқиб кетиб, Ню Ёркка етказганди.
АҚШ расмийлари Венесуела президентини мамлакатга гиёҳванд моддаларни контрабанда қилиш ва қурол сақлашда, унинг рафиқасини эса гиёҳванд моддалар контрабандаси ҳамда пора олишда айбламоқда.
Улар бу айбловларни рад этиб келади.
Мадуро ва Флорес айни пайтда Ню Ёркдаги тергов изоляторида сақланмоқда.
Венесуела президентини қўлга олиш операцияси АҚШ учун сўнгги йиллардаги энг мураккаб операциялардан бири бўлган.
Бир неча ой давомида МРБ агентлари яширинча Мадуро ҳақида разведка маълумотларини тўплаган, ҳарбийлар эса ҳужумни ишлаб чиқиш учун унинг қароргоҳининг аниқ нусхасини ясаган.