АҚШ Кубага қарши савдо эмбаргосини яна бир йилга узайтирди

АҚШ Куба билан савдо эмбаргосини яна бир йилга узайтирди. Бу ҳақда Президент Доналд Трампнинг баёноти Қўшма Штатлар ҳукуматининг расмий нашри бўлмиш Федерал Регистеръда эълон қилинди.

Трампнинг сўзларига кўра, "ушбу ваколатларнинг Куба бўйича амал қилишини яна 1 йилга узайтириш АҚШ миллий манфаатларига мос келади".

14-сентябрда тугаши керак бўлган савдо эмбаргоси энди 2027-йилнинг 14-сентябрига қадар давом этади. АҚШ 1961-йилда оролдаги ўзига тегишли мол-мулклар давлат мулкига айлантирилгач, Куба билан дипломатик алоқаларни узган ва шундан сўнг мамлакатга нисбатан савдо ва иқтисодий эмбарго жорий этилган эди.

2014-йил декабр ойида ўша пайтдаги АҚШ президенти Барак Обама Вашингтоннинг Гаванага нисбатан аввалги сиёсати самарасиз бўлганини тан олган эди. У икки томонлама муносабатларни меъёрлаштириш ва санксияларни юмшатиш бўйича қадамларни эълон қилди. 2015-йилда Обама маъмурияти Кубани терроризмни қўллаб-қувватловчи давлатлар рўйхатидан чиқарган эди.

Икки мамлакат ўртасидаги яқинлашув 2017-йил январ ойида республикачи Доналд Трамп ҳокимиятга келгач тўхтаб қолди. У АҚШ фуқароларининг Кубага ташриф буюриш қоидаларини мураккаблаштирди ва Куба ҳарбийлари назоратидаги ташкилотлар билан бизнес юритишни тақиқлади. Шунингдек, Трамп маъмурияти Кубани яна терроризм ҳомийси бўлган давлатлар рўйхатига киритди.

5-март куни Трамп Вашингтон Эронга қарши ҳарбий амалиётни якунлагач, Кубага нисбатан кейинги қадамларни белгилаб олишини айтди. 27-февралда Оқ уй раҳбари АҚШ Кубани ўз назоратига олиши мумкинлигини билдирди. Политисо нашри 18-май куни Қўшма Штатлар ҳукумати Кубага қарши ҳарбий куч ишлатишга тобора кўпроқ мойил бўлаётгани ҳақида ёзди. Июн ойида Ахиосъга берган интервюсида АҚШ президенти Кубада раҳбариятни ўзгартиришини истисно этмади.

Аввалроқ Куба президенти Мигел Диас-Канел АҚШни ўз халқига нисбатан геноцид содир этаётганликда ва мамлакатни эгаллаб олишга уринаётганликда айблагани ҳақида хабар берилганди.