АҚШ конгрессмени самолёти кўлга фавқулодда қўнишга мажбур бўлганидан кейин сузиб хавфсиз жойга етиб олди
Вакил Том Тиффани бўлган кичик самолётда техник носозлик юзага келган ва бу учувчини Висконсин кўлига фавқулодда қўнишга мажбур қилган.
АҚШ конгрессмени самолёти кўлга фавқулодда қўнишга мажбур бўлганидан кейин сузиб қутулди
Висконсин штатидан конгрессмен Том Тиффани ўзи бўлган самолёт кўлга қўнганидан кейин енгил жароҳат олганини, у ва учувчи сузиб хавфсиз жойга етиб олишганини маълум қилди.
Шериф идорасининг хабарига кўра, штат губернаторлигига Республикачилар партиясидан номзод бўлган Тиффани шанба куни кечқурун кичик самолётда кетаётган бўлган. Самолётда техник муаммо юзага келгач, учувчи Восо кўлига (Lake Wausau) фавқулодда қўнишни амалга оширган.
Тиффанининг айтишича, у ва учувчи қўнгандан сўнг 911 хизматига қўнғироқ қилишган.
«Самолёт сувга чўка бошлагач, биз ундан чиқиб, тайёзликка қараб суздик ва у ерда қутқарувчилар қайиқда етиб келгунча кутиб турдик», деб ёзди Тиффани ижтимоий тармоқда. Учувчи ҳам енгил жароҳат олган.
Якшанба куни Тиффани Ла-Кросс округидаги кечки овқатдан уйига қайтаётганида, Восо марказий аэропортига яқинлашганда самолётнинг двигатели тўсатдан ўчиб қолганини айтди.
Марафон округи шерифи идорасининг матбуот учун баёнотида айтилишича, расмийлар маҳаллий вақт билан соат 20:49 да (Британия ёзги вақти билан 02:49) кўлга самолёт қулагани ҳақида 911 хабарини олишган. Шериф идораси маълумотларига кўра, икки киши самолётни тарк этиб, тайёз сувга етиб олишга муваффақ бўлган ва у ерда Восо ўт ўчириш бошқармасининг ҳаво ёстиқли қайиғи уларни тахминан 15 дақиқадан сўнг, маҳаллий вақт билан соат 21:05 да қутқариб олган.
Идоранинг билдиришича, Тиффани ва учувчи Beechcraft K35 — беш кишигача ташишга мўлжалланган, Bonanza номи билан ҳам танилган бир двигателли самолёт бортидаги ягона икки киши бўлган.
«Бугун кечаси Худо бизни асради ва мен шифохонада рафиқам Крис ёнимда бўлиб турганидан жуда миннатдорман», деди Тиффани. «Бу каби воқеалар ҳаёт қанчалик қадрли эканини эслатиб туради».
Унинг сайловолди штабига кўра, ушбу ҳодисада у ўнг кўзининг тепасидан кичик жароҳат олган.
Техник муаммонинг сабаби ҳозирча аниқ эмас, шериф идораси Федерал авиация бошқармаси ва Миллий транспорт хавфсизлиги кенгаши ҳодиса юзасидан тергов олиб боришини маълум қилди.
Самолёт ҳали ҳам кўлда қолмоқда, қутқарув гуруҳлари уни олиб чиқиш устида ишламоқда, дея қўшимча қилди идора.