АҚШ Демократлари Дональд Трампга қарши кенг кўламли терговлар тайёрламоқда

АҚШ Демократлари Дональд Трампга қарши кенг кўламли терговлар тайёрламоқда

АҚШ Вакиллар палатасидаги демократлар ноябрь ойидаги оралиқ сайловларда ғалаба қозонган тақдирда, президент Дональд Трамп, унинг маъмурияти ва оиласига нисбатан тергов олиб боришнинг йирик режасини ишлаб чиқмоқда. Қонунчилар эътибори марказида Трамп оиласининг даромадлари, давлат аппаратини ислоҳ қилиш, ҳукумат томонидан берилган афвлар ва ташқи сиёсат бўлади.

Демократик партия вакиллари ва асосий қўмиталар ходимлари Трампнинг ўсиб бораётган бойлигини, унинг федерал идораларга таъсирини ва сиёсий рақибларини таъқиб қилишини текширишга қаратилган кун тартибини шакллантирмоқда. Текширувларни тайёрлаш учун қонунчилар аллақачон ташқи экспертлар ва соҳавий ташкилотларни жалб қилмоқда.

Трамп оиласи даромадларини тергов қилиш доирасида қонунчилар хориждан келиб тушган молиявий маблағларни ўрганишни режалаштирган. Конгрессмен Роберт Гарсиянинг махсус трекери маълумотларига кўра, Трампнинг иккинчи муддати биринчи йилида хорижий тўловлар 2,25 миллиард долларни ташкил этган. Конгрессмен Жеми Раскин кичик Дональд Трамп ва Эрик Трамп билан боғлиқ бўлган 1789 Capital ва American Ventures венчур фирмаларининг инвестицияларини, шунингдек, Truth Social платформаси битимларини ва Жаред Кушнернинг бизнесини текширмоқчи.

Бундан ташқари, афв этиш тўғрисидаги қарорлар ҳам назоратга олинади. Қонунчиларни 38 миллион долларлик фирибгарлик учун ҳукм қилинганидан кейин афв этилишини лобби қилишга қарийб 1 миллион доллар сарфлаган тадбиркор Жозеф Шварц иши қизиқтириб қолди. Шунингдек, Трампнинг донорига тегишли бўлган Луизианадаги суюлтирилган табиий газ лойиҳасига инвестиция киритиши шарт бўлган Германия энергетика компанияси билан тузилган 1,2 миллиард долларлик келишув ҳам текширилади.

Ички ишлар соҳасида қонунчилар Оқ уй ва Кеннеди марказини реконструкция қилиш лойиҳаларини, шунингдек, иммиграция хизматларининг ҳаракатларини текшириш ниятида. Миннеаполисдаги ҳодисалар, сақлаш марказларида фуқароларнинг ҳалок бўлиши ва Кристи Ноэм раҳбарлигидаги Ички хавфсизлик вазирлиги шартномалари текширувларга сабаб бўлди.

Давлат аппаратини ислоҳ қилиш, разведкадаги кадрлар тозалови, DOGE хизматидаги оммавий ишдан бўшатишлар, АҚШ Халқаро тараққиёт агентлигини (USAID) тугатиш ва Таълим вазирлигини тарқатиб юборишга алоҳида эътибор қаратиш режалаштирилган. Демократлар, шунингдек, сиёсий рақибларнинг жиноий таъқиб қилиниши фактларини ва "ҳокимиятдан қурол сифатида фойдаланиш"дан жабр кўрганларга товон тўлаш учун 1,8 миллиард долларлик жамғарма ташкил этишнинг муваффақиятсиз уринишини ўрганиш ниятида.

Тижорат ва давлат институтларига, жумладан, юридик фирмалар, Apple ва Google компанияларига бўлган босим, шунингдек, Дэвид Эллисон томонидан Paramount медиахолдингининг сотиб олиниши ҳам диққат марказида бўлади. Ташқи сиёсатда қонунчилар Стив Уиткофф ва Жаред Кушнернинг дипломатик фаолиятини текширишни режалаштирмоқда ва БАА инвесторлари уларнинг криптокомпаниясидаги 500 миллион долларлик улушни сотиб олгани сабабли юзага келиши мумкин бўлган манфаатлар тўқнашувига ишора қилмоқда. Қўшимча равишда Жеффри Эпштейн иши бўйича янги эшитувлар ўтказиш режалаштирилган.

Оқ уй вакиллари демократларнинг режаларини президент кун тартибига тўсқинлик қилишга уриниш деб атади. Матбуот котиби Анна Келли Уиткофф криптобизнесдан чиққанини ва унинг фаолияти АҚШ манфаатларини самарали илгари сураётганини айтди. Маъмурият аллақачон ҳимоянинг ҳуқуқий механизмларини, жумладан, ижро этувчи имтиёздан фойдаланишни ишлаб чиқмоқда. Шу билан бирга, конгрессмен Жим Хаймс ҳамкасбларини Роберт Мюллер тергови тажрибасини эслатиб, жамоатчилик кутишларини ҳаддан ташқари ошириб юбормасликка чақирди.