АҚШ давлат котиби Марко Рубио Ўзбекистон билан шерикликни стратегик муҳим деб атади. Видео
АҚШ давлат котиби Марко Рубио Ўзбекистон билан шерикликни стратегик муҳим деб атади. Видео
Ўзбекистонга ташрифи олдидан АҚШ давлат котиби Марко Рубио дунёдаги глобал беқарорлик фонида Самарқандга жўнаб кетиш қарорига изоҳ бериб, республика билан муносабатлар стратегик аҳамиятга эга эканини таъкидлади.
АҚШ ташқи сиёсат идораси раҳбарининг сўзларига кўра, ушбу ташриф инқирозлар ёки муаммолар туфайли эмас, балки икки томонлама ҳамкорликни мустаҳкамлаш ниятида амалга оширилмоқда.
Рубио Ўзбекистон ва Марказий Осиё мамлакатлари билан алоқаларни чуқурлаштириш Вашингтон ташқи сиёсатининг асосий устувор йўналишларидан бири эканини қайд этди. Давлат департаменти маълум қилишича, ташриф 17 октябрдан 22 октябргача давом этади ва Самарқандни, шунингдек, Ҳиндистоннинг Мумбай ва Жамнагар шаҳарларини ўз ичига олади.
Самарқандда АҚШ давлат котиби "С5+1" форматидаги вазирлар учрашувида иштирок этади ва Ўзбекистон раҳбарияти билан музокаралар ўтказади, унда савдо ҳажмини кенгайтириш, хусусий инвестицияларни жалб қилиш ва иқтисодий модернизация масалалари муҳокама қилинади.
Давлат департаменти раҳбарига 200 дан ортиқ Америка бизнеси етакчиларидан иборат нуфузли тижорат делегацияси ҳамроҳлик қилмоқда, бу эса, таъкидланганидек, ишбилармонлик шериклигининг янги босқичини очади.
Таъкидлаш жоизки, "С5+1" платформаси 2015 йилда ташкил этилган бўлиб, унинг биринчи вазирлар учрашуви айнан Самарқандда бўлиб ўтган эди. Орадан 10 йилдан ортиқ вақт ўтиб, дипломатик формат энергетика, транспорт, муҳим минераллар соҳаси, рақамли технологиялар ва қишлоқ хўжалигида қўшма лойиҳаларни илгари суриш учун яна у ерга қайтмоқда.