Apple Music Баттерсида концерт залини очади
Технология гиганти ўзининг концерт залини қурди, бироқ кичик саҳналар билан рақобатлашмаслигини айтмоқда.
Apple Music Баттерси ҳудудида концерт залини очишга тайёрланмоқда
Зал собиқ электр станциясининг шимолий томонида, Темза дарёсига қараган манзарали жойда жойлашади
АҚШнинг Apple технологик компанияси Лондонда, Баттерси электр станциясидаги (Battersea Power Station) ўзининг Европа бош қароргоҳи остида жойлашган янги, энг замонавий концерт залини очишга тайёргарлик кўрмоқда.
600 кишига мўлжалланган ушбу маконда таниқли ижрочилар ва янгидан танилаётган гуруҳларнинг бир марталик чиқишлари ташкил этилади, ҳар бир шоу тасвирга олиниб, онлайн тарзда жонли эфирга узатилади.
Apple Music вице-президенти Оливер Шуссер BBC News телеканалига берган интервьюсида яқин ҳафталарда очилиши кутилаётган ушбу масканда "дунёнинг исталган нуқтасидаги худди шундай ҳажмдаги ҳар қандай залдан кўра кўпроқ камера ва карнайлар" борлигини айтди.
Ушбу очилиш Лондоннинг жонли мусиқа сектори жиддий инқирозни бошдан кечираётган, биргина ўтган йилнинг ўзида пойтахтда 45 та мусиқа зали ёпилган бир пайтга тўғри келди.
Бу бутун мамлакат бўйлаб кузатилаётган умумий тенденцияни акс эттиради: 2020 йилдан 2025 йилгача бўлган даврда, яшаш харажатлари ортиши ва одамларнинг пандемиядан кейинги турмуш тарзи ўзгариши натижасида Буюк Британияда 400 га яқин клуб ёпилди.
Лондондаги ёпилиш кўрсаткичи мамлакатнинг қолган қисмига қараганда юқорироқ, демак, яхши молиялаштирилган технологик компаниянинг кириб келиши мустақил заллар операторларини хавотирга солиши мумкин.
Бироқ, Шуссер янги лойиҳа мижозларни тортиб олишни мақсад қилмаганини таъкидлади.
"Биз жонли концертлар бизнесига кирмоқчи эмасмиз. Биз ҳеч ким билан рақобатлашмоқчи эмасмиз.
Биз бу масканни оддий концерт зали каби чипталар ва бошқа хизматлар билан бошқарамиз, аммо биз учун ягона мақсад — санъаткорлар билан ажойиб ишларни амалга ошириш, уларни мухлислар билан боғлаш ва ушбу контентни Apple Music платформасида намойиш этишдир.
Бизнинг бошқа бировнинг йўлига тўғаноқ бўлиш ниятимиз умуман йўқ ва бу маконнинг кичикроқ қилиб қурилганининг асосий сабабларидан бири ҳам шундадир".
Зал санъаткорлар саҳнани кенг кўламли телекўрсатувлардан тортиб, кичик доирадаги акустик чиқишларгача мослаштира олишлари учун қурилган
Санъаткорлар саҳнага аввалги Apple Music концертларидан олинган фотосуратлар ёнидан ўтиб киришади
Apple Music Hall деб номланган ушбу маскан компаниянинг бундан тўққиз йил аввал машҳур iTunes Festival лойиҳасини тугатганидан кейин Лондонга қайтишини англатади. Ўшанда Koko ва The Roundhouse каби залларда бепул ўтказилган концертларда Леди Гага, Элтон Жон, Бритни Спирс ва Адель каби юлдузлар иштирок этган эди.
Маданият вазири Лиза Нэнди бу қадамни олқишлаб, уни "Буюк Британиянинг глобал ижодий марказ сифатидаги мавқеига бўлган улкан ишонч" ва "ижодий соҳаларимиз аслида қанчалик кучли эканлигининг белгиси" деб атади.
Очилиш маросимида ким чиқиш қилиши ҳақидаги маълумотлар тез орада эълон қилиниши кутилмоқда.
Бу собиқ электр станциясининг Арт Деко услубини акс эттирувчи, нақшинкор равоқлар ва ғиштли деворларга эга ихчам, шинам маскандир. Аммо акс-садо муаммо туғдирмаслиги керак — ҳатто ғиштлар ҳам акс этган товушни ютиш учун махсус танланган.
Саҳнанинг узунлиги 38 фут (тахминан 11,5 метр) бўлиб, уни ҳам "айлана шаклида", ҳам анъанавий рўпарага қараган чиқишлар учун мослаштириш мумкин, кийиниш хоналарида эса душ ва махсус либослар сақлаш жойлари мавжуд.
Бинода, шунингдек, Apple Music радиостанциялари учун янги студиялар ҳам жойлашган бўлиб, улар Кингс-Кроссдаги ҳозирги базасидан шу ерга кўчиб ўтади. Бундан ташқари, дижейлик микслари, қўшиқ ёзиш лагерлари ва гуруҳлар репетициялари учун махсус хоналар ажратилган.
Бутун бино видео ва аудио ускуналар билан жиҳозланган бўлиб, бу санъаткорларга бир куннинг ўзида келиб, подкаст ёзиш, радиошоуда чиқиш қилиш ва концертни жонли эфирда узатиш имконини беради.
Apple эксклюзив контент яратиш орқали ўз хизматини Spotify ва Amazon Music каби рақобатчиларидан ажратиб туришига умид қилмоқда.
Бу қадам афсонавий мусиқа продюсери Жимми Айовиннинг мусиқа стриминг хизматлари "эскириш арафасида турибди", чунки улар тингловчи ва мусиқа ўртасида алоқа ўрната олмаяпти, деган фикрларидан сўнг амалга оширилди.
"Бу бир ўлчамли нарса. Бу худди банкоматга ўхшайди", — деди Брюс Спрингстиндан тортиб Тупак Шакургача бўлган санъаткорлар билан ишлаган Айовин шу йилнинг февраль ойида берган интервьюсида.
"Санъаткорлар ўз мухлислари билан мулоқот қилишни хоҳлашади, тамом. Уларнинг истаги шу.
Бу хайрия мақсадларида эмас, балки TikTok ва Instagram айнан шу ишни қилаётгани учундир".
Кийиниш ва дам олиш хоналари Баттерси электр станциясининг эстетикасига мос равишда лойиҳалаштирилган
Apple компаниясида 21 йилдан бери, жумладан, 2014–2018 йилларда Айовин ижодий маслаҳатчи бўлиб ишлаган даврда ҳам фаолият юритган Шуссер бу фикрга қўшилди.
"Биз мусиқа хизматларимиз шунчаки интернетдаги номаълум бир жой бўлиб, тугмани босганингизда мусиқа янграйдиган макон бўлиб қолишини истамаймиз.
Кўпгина санъаткорлар учун стриминг бироз зерикарли. У ерда улар қиладиган иш йўқ. Мусиқа лейбллар томонидан етказиб берилади, кейин эса у шунчаки плейлистлар тўпламига айланади.
Аммо [мухлислар] санъаткорлар билан учрашиш, улар ҳақида кўпроқ билиш, альбомни нега айнан шундай тарзда яратганликларини тушуниш имкониятига эга бўлишни хоҳлашади".
Шуссернинг қўшимча қилишича, Apple тинглаш одатлари бир жойда қотиб қолган бир пайтда, муваффақиятга эришиши қийин бўлган янги ва истиқболли гуруҳларни қўллаб-қувватлашга ҳам умид қилмоқда.
"Бу ҳозирги кунда мусиқа бизнесидаги энг катта имкониятлардан ва айни пайтда қийинчиликлардан биридир.
Ўзларининг [эски] каталогларига таянадиган санъаткорлар жуда кўп. Эски мусиқалар каталоги ажойиб, аммо биз бундан 10, 20 йил кейин янги даврнинг мусиқа каталоги мавжуд бўлишини таъминлашимиз керак".