Антиқа жиноят: уддабурон мотороллерни қандай олиб қочди?
Транспорт воситасини олиб қочиш жиноятини ўша транспорт воситасига қўл теккизмаган ҳолда ҳам содир қилиш мумкин. Буни Тошкент шаҳрида яшовчи хавфли рецидивист амалда кўрсатиб берди: 52 ёшли эркак кўчада қаровсиз қолдирилган мотороллерни антиқа усулда олиб қочди.
Антиқа жиноят: уддабурон мотороллерни қандай олиб қочди?
Тошкент шаҳрида кўчада турган мотороллерни олиб қочган эркак жиноий жазога тортилди.
Суд ҳукмига кўра, 1974-йилда туғилган Ф.Н. Чилонзор туманида уй олдида турган мотороллерни олиб кетган. Транспорт воситаси бошқарув сервис компаниясига тегишли бўлган.
Бунгача 6-марта судланган ва хавфли рецидивист бўлган эркак жиноятни ноодатий усулда амалга оширган. У мотороллер олдига бориб, Телеграмънинг сақланган хабарлар бўлимига жой геолокациясини ташлаб олган. Сўнгра у ердан кетган.
Йўл-йўлакай бекат ва кўчалардаги эълонларни кўздан кечириб, эвакуатор хизматини топган ва қўнғироқ қилган.
“Чилонзор тумани 19-мавзеси 16-уй олдида уч ғилдиракли скутерим бор, ўшани эски Тошми томонга олиб бориб беринг, ўзим қабул қилиб оламан”, деган эркак эвакуатор ҳайдовчисига.
Ҳайдовчи хизмат ҳақи 300 минг сўм бўлишини айтган, Ф.Н. эса 250 минг сўм беришини билдирган. Савдо пишгач, Ф.Н. эвакуатор ҳайдовчисига мотороллер турган жой геолокациясини жўнатган.
Орадан бир соат вақт ўтиб, ҳайдовчи қўнғироқ қилган ва манзилга борганини айтган. Ф.Н. унга мотороллерни юклаб келаверишни, ўзи бозорда эканини, бозорлик қилиб бўлгач “Эски Тошми” олдида йўл четидаги мева-чева сотадиган жойда кутиб олишини маълум қилган.
Шу тариқа, эвакуатор ҳайдовчиси мотороллерни юклаб, айтилган манзилга келган. Ф.Н. унга бироздан сўнг етиб боришини, банк карта рақамини айца, пул ўтказишини” билдирган. Сўнгра ҳайдовчи айтган банк картасига кўчада турган ПайНет қурилмасидан пул ўтказган ҳамда “агар улгурмасам скутерни ўша ерга тушириб кетаверинг”, деган.
Хизмат ҳақини олган эвакуатор ҳайдовчиси мотороллерни айтилган манзилга тушириб кетган. Ф.Н. эса мотороллерга яқинлашмасдан уни 2-3 кун кузатишга қарор қилган. Агар ҳеч ким тегмаса, кейин металлоломга топшириб, пулини ўз эҳтиёжларига сарфлаш режасини тузган.
Орадан 2 кун ўтиб, “ўлжа”ни кузатишга борган Ф.Н. мотороллер жойида йўқлигини кўрган. Чунки, бошқарув сервис компанияси транспорт воситаси олиб қочиб кетилгани ҳақида “102”га хабар берган ва мотороллер эвакуатор ташлаб кетган жойдан топилганди.
Суд ҳукми билан Ф.Н. Жиноят кодексининг 267-моддаси 2-қисми “г” бандида (талон-торож қилиш мақсадида ўғрилик ёки талончилик йўли билан транспорт воситасини олиб қочиш) назарда тутилган жиноятни содир этганликда айбли деб топилган. Унга Жиноят кодексининг 57-моддасини қўллаган ҳолда 6 йил муддатга озодликдан маҳрум қилиш жазоси тайинланган.