Андижонда профилактика инспектори шахсий адоват ортидан фуқаронинг уйини ёқиб юборди
Ҳолат Избоскан туманида содир бўлган. Олтинкўл тумани ИИБ профилактика инспектори бўлиб ишлаган эркак спиртли ичимлик ичган ҳолда ярим тунда адовати бўлган шахснинг уйига борган. У аввалига хонадон деразасини синдирган. Сўнгра қоғоз ёқиб, ичкарига улоқтирган ва воқеа жойидан яширинган.
Андижонда профилактика инспектори шахсий адоват сабаб фуқаронинг уйини ёқиб юборди
Андижонда шахсий адовати туфайли бировнинг уйини ёқиб юборган эркак жиноий жазога тортилди. У ИИБ ходими бўлган.
Суд ҳукмига кўра, 24 ёшли С.Ғ. 2026-йил 20-апрелга қадар Олтинкўл туманидаги Ганжиравон маҳалласида профилактика инспектори сифатида ишлаган. У 17-апрел куни ярим тунда Избоскан тумани Тошкечик маҳалласига бориб, ўзаро шахсий адовати бўлган шахснинг уйини ёқиб юборган.
С.Ғ. хонадонда ҳеч ким йўқлигидан фойдаланиб, аввал уй деразасини синдирган. Сўнг қўлидаги қоғозни ёқиб, дераза орқали уй ичига улоқтирган ва воқеа жойидан яширинган. Натижада хонадонда ёнғин келиб чиққан ва 170 млн сўм моддий зарар етказилган.
С.Ғ. судда айбига тўлиқ иқрор бўлган ва адовати бўлган шахс собиқ севгилисининг турмуш ўртоғи эканини айтган.
“2022-2024 йилларда С.Н. билан гаплашиб юрдим. У қиз бошқага турмушга чиқиб кетгач, алоқаларни уздим. 2025-йил куз ойларида онам билан шифохонага кетаётган вақтимда Дамас машинаси ҳайдовчиси, кейинчалик билишимча Ж. менинг йўлимни қисиб ўтиб кетди. Унга эҳтиёт бўлиб юришни айтдим. У менга қараб сўкинди ва онамни ҳақорат қилди. Онам касаллиги сабабли шу вақтда тортишиб ўтирмасдан кетдим.
Кейинчалик у болани суриштирдим ва Ж. собиқ севгилимнинг турмуш ўртоғи эканини билдим. Шундан сўнг унга нисбатан адоват юзага келди. Қишлоғига бориб, уйи ва қаерда яшашини, нима иш қилишини суриштирдим.
2026-йил 16-апрел куни кечаси спиртли ичимлик истеъмол қилдим. Ж. онамдан келиб сўккани эсимга тушиб кетди. Машинамнинг давлат рақам белгисини ечиб олиб, J.ning қишлоғига бордим.
Яшаш хонадонини кўздан кечирдим. Уйда ҳеч ким йўқлигини билиб, деразани тош билан уриб синдирдим. Ўзим билан олиб келган қоғозни ёқиб, синган деразадан ичкарига ташлаб юбордим”, деган С.Ғ. ўз кўрсатмасида.
Собиқ ходим J.ni ўлдиришга қасд қилмаганини, уйда ҳеч ким йўқлигини билгач, бу ишни қилганини билдирган ҳамда суддан енгиллик сўраган.
ЖИБ Избоскан туман судининг ҳукми билан С.Ғ. Жиноят кодексининг 173-моддаси (мулкни қасддан нобуд қилиш ёки унга зарар етказиш) 2-қисми “в” банди билан айбли деб топилди. Унга 2,5 йил муддатга озодликдан маҳрум қилиш жазоси тайинланди. Шунингдек, С.Ғ.дан жабрланувчи фойдасига 170 млн сўм моддий зарар ундириш белгиланди.