Андижонда Лабо юкхонасида олти нафар болани ташиган ҳайдовчи жаримага тортилди
Андижонда Лабо автомобилининг юкхонасида олти нафар болани олиб кетган 26 ёшли ҳайдовчига 840 минг сўм жарима ва 0,3 жарима бали белгиланди. Болалар ҳайдовчининг қариндошлари бўлган.
Андижонда Лабо юкхонасида олти нафар болани олиб кетган ҳайдовчи жаримага тортилди
Андижон вилоятининг Марҳамат туманида Лабо русумли автомобилнинг юкхонасида олти нафар вояга етмаган болани ташиган ҳайдовчига нисбатан чора кўрилди.
Бу ҳолат ижтимоий тармоқларда тарқалган видео орқали аниқланган. Вилоят ИИБ Йўл ҳаракати хавфсизлиги бошқармаси вакиллари воқеани ўрганиб чиққан.
Ҳодиса Марҳамат туманидаги Буюк Турон кўчаси, 23-сонли давлат мактабгача таълим ташкилоти рўпарасида юз берган. Текширув давомида 26 ёшли ҳайдовчи Лабо автомобилининг юк ташиш қисмида олти нафар вояга етмаган болани олиб кетгани маълум бўлган. Болалар ҳайдовчининг қариндошлари экани аниқланган.
Ҳайдовчининг айтишича, у 2026-йил 29-сентабр куни отасига совға қилиш учун Лабо русумли автомобил сотиб олган ва уни олиб кетаётганда жиянларини машинасининг орқа қисмига жойлаштирган. У қилган ишидан пушаймонлигини билдирган.
Ҳайдовчига Маъмурий жавобгарлик тўғрисидаги кодекснинг 128−8-моддаси 1-қисми (Одам ташиш қоидаларини бузиш) асосида БҲМнинг 2 баравари — 840 минг сўм миқдорида жарима қўлланган. Бундан ташқари, унга 0,3 жарима бали белгиланган.
Ҳолат юзасидан ҳайдовчига қонуний чора кўрилган. Муассаса мудирасига эса болаларни бундай тарзда ташишнинг хавфли оқибатлари тушунтирилган. Ҳужжатлар вилоят Мактаб ва мактабгача таълим бошқармасига юборилган.