Андижонда боғча лицензияси учун 10 минг доллар сўраган шахс ушланди

Андижонда боғча очиш учун лицензия олиб беришни ваъда қилиб, 10 минг доллар талаб қилган шахс қўлга олинди. Бу ҳақда Ички ишлар вазирлиги маълум қилди.

Хабарга кўра, 1984-йилда Андижон туманида туғилган фуқаро Балиқчи туманида яшовчи 1974-йилда туғилган фуқарога хусусий мактабгача таълим муассасаси ташкил этишда ёрдам беришини айтган. У юқори лавозимдаги танишлари орқали лицензия ва бошқа керакли рухсатномаларни олиб беришни ваъда қилган.

Бунинг эвазига у фуқародан 10 минг доллар сўраган. Ўтказилган тезкор тадбир давомида гумонланувчи Андижон шаҳрининг Мустақиллик маҳалласида келишилган пулнинг 5 минг долларини олаётган вақтида ашёвий далиллар билан ушланган.

Мазкур ҳолат юзасидан жиноят иши қўзғатилиб, гумонланувчи процессуал тартибда ҳибсга олинган. Ҳозирда дастлабки тергов ҳаракатлари олиб борилмоқда.

Эслатиб ўтамиз, аввалроқ Наманганда собиқ банк раҳбари фуқародан 20 минг доллар олаётганда қўлга олинган эди. У фуқарога вилоят насос стансиялари ва энергетика бошқармаси балансидаги, Норин туманида жойлашган ер майдонини сотишни таклиф қилган. Шунингдек, Фарғонада Кадастрлар палатаси туман филиали раҳбари пора билан ушланган эди.