Андижон божхоначилари юк машинасида декларацияланмаган 20 минг долларни топдилар
Андижон божхоначилари юк машинасида декларацияда кўрсатилмаган 20 минг долларни аниқлашди
Андижон вилоятидаги «Хонобод» чегара божхона постида қўшни давлатга қараб ҳаракатланаётган автомобилни кўздан кечириш чоғида божхона назоратига тақдим этилмаган 20 минг доллар нақд пул аниқланди. Ҳайдовчи, шунингдек, оғзаки сўров пайтида ушбу маблағ мавжудлигини кўрсатмаган.
Бу ҳақда 24 октябрь куни Ўзбекистон Давлат божхона хизмати хабар берди. Декларацияланмаган валюта транспорт воситасини божхона кўрикдан ўтказиш чоғида топилган.
Ҳозирда ушбу факт юзасидан суриштирув ҳаракатлари олиб борилмоқда. Ҳодисанинг бошқа тафсилотлари очиқланмаяпти.
Аввалроқ Андижон вилоятидаги бошқа бир чегара божхона постида Қирғизистонга йўл олган юк машинаси ҳайдовчисидан у декларация қилмаган 34 минг доллар топилган эди. Нақд пуллар эркакнинг қўл сумкаси ва кийими чўнтакларидан аниқланган.