Amazon ва Temu платформаларида соф кумуш сифатида сотилган заргарлик буюмлари таркибида заҳарли кимёвий моддалар борлиги аниқланди
Watchdog томонидан ўтказилган суриштирувда Amazon, Etsy, Temu, eBay ва OnBuy платформаларидан сотиб олинган 25 та маҳсулот таҳлил қилинди.
Amazon ва Temu платформаларида соф кумуш сифатида сотилган заргарлик буюмлари таркибида заҳарли кимёвий моддалар борлиги аниқланди
Меранда соф кумуш сифатида сотилган маржонни сотиб олганидан сўнг териси таъсирланганини ҳис қилди
BBC суриштирувидан сўнг, йирик онлайн савдо майдончаларида соф кумуш сифатида тарғиб қилинган заргарлик буюмлари таркибида заҳарли кимёвий моддалар борлиги аниқланди.
Мутахассислар Amazon, eBay, Temu, Etsy ва OnBuy платформаларидан сотиб олинган 25 та буюмни текшириб кўришди.
Лаборатория синовлари шуни кўрсатдики, саккизта буюм таркибида саратон касаллигини келтириб чиқариши мумкин бўлган кадмий кимёвий моддаси ноқонуний миқдорда мавжуд. Фақат иккита буюмни соф кумуш деб таснифлаш мумкин эди.
Amazon, eBay, Temu ва OnBuy чалғитувчи эълонлар тақиқланганини ва Watchdog томонидан аниқланган заргарлик буюмларини олиб ташлаганини билдирди. Etsy жавоб бермади.
925 пробали ёки соф кумуш сифатида реклама қилинаётган арзон заргарлик буюмлари сизни қизиқтиряптими? Уларнинг ҳақиқийлигини текшириш бўйича Watchdog суриштируви шуни кўрсатдики, баъзи буюмлар таркибида заҳарли кимёвий моддалар мавжуд.
34 ёшли Меранда Etsy платформасида қўлда ясалган соф кумуш сифатида кўрсатилган маржонни сотиб олган, аммо у бир неча кун тақиб юрганидан сўнг "бўйни жуда қаттиқ таъсирлана бошлаганини" айтади.
"Ечиб олаётганда унга қараганим ва бунинг ранги тўғри келмаяпти, деб ўйлаганим ёдимда."
Меранданинг маржони, Watchdog томонидан сотиб олинган бошқа 25 та буюм билан бирга, Шеффилд синов идораси (Sheffield Assay Office) томонидан таҳлил қилинди.
Дастлабки синовлар шуни кўрсатдики, Меранданинг маржони таркибида терининг таъсирланишига олиб келиши мумкин бўлган яна бир заҳарли кимёвий модда — никель бор. Заргарлик буюмларида қанча никель бўлиши мумкинлиги бўйича қатъий ҳуқуқий чекловлар мавжуд.
Watchdog таҳлил қилиш учун бешта онлайн савдо майдончасидан 925 пробали ёки соф кумуш сифатида тавсифланган бешта заргарлик буюмини сотиб олди.
Меранданинг маржонида никель асоратлари топилган, аммо занжирнинг бир қисмида унинг концентрацияси 11% гача етган.
Соф кумушдан ясалган заргарлик буюмлари одатда никель сақламайди, гарчи у баъзи арзонроқ буюмларда учраб турса ҳам.
Watchdog томонидан сотиб олинган 25 та заргарлик буюмларидан — жумладан 1,55 фунт стерлинглик билакузук ва 1,99 фунт стерлинглик сирға каби буюмлар — саккизтасида кадмий миқдори 0,01% лик қонуний меъёрдан юқори бўлган.
Баъзиларида кадмий миқдори 10% гача етган. "Бу биз амал қилаётган чекловларга нисбатан жуда ҳам кўп", дейди таҳлилга бошчилик қилган Софи Лэнгли.
Кадмий канцероген модда бўлиб, айниқса ўпка саратони билан боғлиқ, дейди истеъфодаги токсикология профессори Роб Чилкотт.
Агар у нафас йўллари орқали кирса ёки ютиб юборилса, инсонлар учун хавф туғдиради. Масалан, сирға сиз енгган овқатга тушиб кетса.
"Агар таркибида кадмий бўлган нарсани оғзингизга солсангиз ёки ҳақиқатан ҳам уни ютиб юборсангиз, бу жуда ёмон оқибатларга олиб келади", дейди у.
Кадмий меъёрларини бузган саккизта буюмдан учтаси Amazon'дан, учтаси Temu'дан ва биттадан OnBuy ҳамда Etsy'дан сотиб олинган.
Меранда маржонни биринчи марта олганида унда бирор нарса нотўғри деб ўйлашга ҳеч қандай сабаб бўлмаганини айтади.
"У жуда ялтирар эди. Ҳақиқийга ўхшарди", дейди у. "У соф кумуш эмас деб ўйламагандим."
Унга 925 рақами босилган эди. Ҳақиқий соф кумуш таркибида камида 92,5% кумуш бўлиши керак.
Аммо синовлар унинг маржонининг бир қисмида бор-йўғи 8,9% кумуш борлигини кўрсатди.
Қалбаки соф кумушни сотиш Тамғалаш тўғрисидаги қонунни бузиш ҳисобланади ва жаримага ёки озодликдан маҳрум қилишга олиб келиши мумкин, дейди Лэнгли.
Тему ББС'га эҳтимолий хавфларни аниқлаш учун шунга ўхшаш маҳсулотларни синовдан ўтказишни ташкил қилганини айтди.
Amazon ва eBay хавотирда бўлган мижозлар ёрдам сўраб уларга мурожаат қилишлари кераклигини билдирди. Amazon ўшандан бери Watchdog хавфли деб топган маҳсулотлар учун қайтариб олиш билдиришномаларини чиқарди.
OnBuy зарар кўрган мижозларга пулни қайтариб беришни таклиф қилганини ва таҳлилларимизга кўра таркибида кадмий бўлган маҳсулотни қайтариб олишни бошлаганини айтди. Etsy жавоб бермади.
Меранда унинг бўйнини таъсирлантирган 15 фунтлик маржон бўйича Etsy сотувчиси билан боғланди. Watchdog билан гаплашгандан сўнг, у пулини тўлиқ қайтариб олди.