Аляскада кит қайиқни чўктириб юборди
Аляскада кит қайиқни чўктириб юборди
Аляскадаги Гласиер Бай миллий боғида саёҳат қилаётган бир оиланинг сафари кутилмаган ҳодиса билан якунланди. Уларнинг 7,6 метрлик елканли қайиғи тунда букри кит билан тўқнашиб, чўкиб кетди. Бу ҳақда Пеопле нашри маълум қилди.
Таня Луис, унинг турмуш ўртоғи Эрик ва 23 ёшли фарзанди Лу 29-июл куни ўз кемаларида саёҳатда эдилар. Кечки соат 23:30 атрофида уйғоқ бўлган Лу қаттиқ зарба овозини эшитиб, ота-онасини уйғотди. Кема ичига сув тезлик билан кира бошлади. Тўқнашувдан сўнг қайиқ атиги уч дақиқа ичида сув остига ғарқ бўлди. Оила қутқарув нимчаларини олишга ҳам улгурмасдан, резина қайиқда қирғоққа етиб олди.
Ярим тунда қирғоққа чиққан оила ўтин йиғиб, китоб варақларидан фойдаланиб гулхан ёқди. Таня ўзи билан бўлган рация орқали фавқулодда хизматлар билан боғланишга уринди. Соат 3:00 атрофида ҳудуддан ўтаётган Натионал Геограпҳис Қуест круиз кемаси капитани сунъий йўлдош телефони орқали рейнжерларга уларнинг жойлашувини хабар қилди. Эрталаб соат 6:30 да боғ хизмати ходимлари оилани қутқариб олди.
Кейинчалик қайиқ сувдан чиқарилганда, унинг корпусида одам сиғадиган улкан тешик ва китга тегишли қора тери бўлаклари топилди. Биологлар бу модданинг ҳақиқатан ҳам букри китга тегишли эканлигини тасдиқлади. Мутахассисларнинг таъкидлашича, букри китлар озиқланаётган вақтда кескин ҳаракатлар қилади ва бундай тўқнашувлар тасодифан юз беради.
Аввалроқ Арктика китларида ҳалокатли вирус аниқлангани ҳақида хабар берилганди.