Алимент учун ариза қандай берилади?
Оила кодексига кўра, ота-она никоҳда бўлиши ёки алоҳида яшашидан қатъи назар, вояга етмаган фарзандини таъминлаши шарт. Агар ота ёки она бу мажбуриятни бажармаса, алимент ўзаро келишув билан ёки суд орқали ундирилади. 2026-йил 1-сентабридан бир бола учун алимент ойига 360 400 сўмдан кам бўлиши мумкин эмас.
Алимент учун ариза қандай топширилади?
Оила кодексининг 96-моддасига мувофиқ, ота-она вояга етмаган фарзандини таъминлаши шарт. Бу мажбурият ҳам отага, ҳам онага тегишли.
Алиментни ота-она ўзаро келишув асосида ихтиёрий равишда ҳам тўлаши мумкин. Бунда судга мурожаат қилиш талаб этилмайди. Ота-она алиментнинг миқдори, уни тўлаш тартиби ва муддатини нотариал тасдиқланган келишувда белгилаб қўйиши ҳам мумкин. Келишувга кўра алимент даромаднинг муайян қисми, вақти-вақти билан тўланадиган қатъий сумма, бир йўла тўланадиган сумма, мол-мулк бериш ёки бошқа усулда тўланиши мумкин.
Вояга етмаган бола учун келишилган алимент миқдори суд ундира оладиган миқдордан кам бўлмаслиги керак.
Агар ота-онадан бири фарзандини таъминлашда қатнашмаса, алимент суд тартибида ундирилади. Бунинг учун алимент олиш ҳуқуқига эга шахс маълум муддат кутиши шарт эмас. Умумий қоида бўйича, алимент судга мурожаат қилинган кундан бошлаб ундирилади.
Алимент ундириш билан боғлиқ ишлар фуқаролик ишлари бўйича судларда кўриб чиқилади.
Алимент ундириш ҳақидаги ариза, одатда, жавобгарнинг яшаш жойидаги судга берилади. Шу билан бирга, алимент талаб қилувчи шахс ўзи яшаб турган жойдаги судга ҳам мурожаат қилиши мумкин.
Алимент ундириш ҳақидаги даъволар бўйича даъвогар давлат божини тўлашдан озод этилади. Бу қоида “Давлат божи тўғрисида”ги қонуннинг 8-моддасида белгиланган.
Судга аризани қоғоз шаклида топшириш билан бирга, қонунчиликда белгиланган тартибда электрон шаклда ҳам юбориш мумкин.