“Аксарияти ярим яланғоч”: ЖАРдаги шаҳарда 9 аёлнинг жасади топилди. Бу серияли қотилликми?

“Кўпчилиги ярим яланғоч”: ЖАРдаги шаҳарда 9 аёлнинг жасади топилди. Бу серияли қотилликми?

Жанубий Африка Республикасининг Экурхулени шаҳрида икки ой ичида зўравонлик аломатлари бўлган тўққиз нафар аёлнинг жасади топилди. Полиция бу қотилликлар ўзаро боғлиқми-йўқлигини текширмоқда. Жасадларнинг аксарияти ярим яланғоч ҳолатда ва танасида калтак излари билан топилган.

15-июл куни ЖАРнинг энг йирик шаҳри Ёханнесбург яқинидаги Экурхулени ҳудудига қарашли Кемптон Паркда, Р21 автомагистрали яқинидан 37 ёшли аёлнинг жасади топилди.

Икки кундан сўнг полиция гумондор сифатида марҳуманинг севгилисини қўлга олди. Расмийлар бошқа тафсилотларни ошкор этмади. Эркак ҳозир ҳибсда сақланмоқда. Шундан бери Экурхуленида яна тўққиз нафар аёлнинг жасади топилгани маълум қилинди.

3-август куни 32 ёшли Итумеленг Кекананинг жасади топилди. У 17-июл куни Кемптон Паркда бедарак йўқолганди.

24-август куни яна бир 32 ёшли аёлнинг жасади топилди. Расмийлар унинг исмини ошкор қилмади. Бу жасад ҳам Кемптон Паркдаги Р21 автомагистрали яқинидан топилган.

7-сентябр куни Клейвиллдаги дарёдан тахминан 20–30 ёшлардаги аёлнинг жасади чиқариб олинди. Унинг устида фақат ички кийим бўлган.

10-сентябр куни Р21 йўли яқинидан яна бир аёлнинг жасади топилди. Бу сафар жасад бутунлай кийимсиз эди. У анча чириб кетгани сабабли аёлнинг ҳатто тахминий ёшини ҳам ҳозирча аниқлашнинг имкони бўлмаган.

Олтинчи аёл — Элизабет “Цонцо” Моселакгомонинг жасади 12-сентябр куни эрталаб Р21 автомагистрали яқинидаги меҳмонхона биноси ортидан топилди. 38 ёшли аёл 9-сентябр куни одатдагидек югуришга чиққан эди. У уйига қайтмагач, саккиз ёшли қизи бу ҳақда қариндошларига хабар берган.

Ўшанда полиция бу ҳолатлар ортида серияли қотил турганига шубҳа қилмаётганини билдирган. Ҳодисалар бир-бирига жуда ўхшаш: жасадларнинг аксарияти ярим яланғоч ҳолатда ва танасида калтак излари билан топилган. Шу сабаб расмийлар маҳаллий аҳолини расман огоҳлантириб, аёлларга Кемптон Парк ҳудудида ёлғиз юрмаслик ва доимо ҳушёр бўлишни тавсия қилди.

14-сентябр куни Олифанцфонтейнда йўловчилардан бири яна бир аёлнинг жасадини топди.

15-сентябр куни Кемптон Паркдан қарийб 45 километр узоқликдаги Кватема ҳудудида йўл четидан 38 ёшли Динео Эвелин Мотапаненинг жасади топилди. Яқинлари уни охирги марта 13-сентябр куни кўрган. Улар аёлнинг йўқолганини полицияга маълум қилишга улгурмасидан унинг жасади топилган.

Ниҳоят, 17-сентябр куни полиция Даун Парк ҳудудидан яна бир аёлнинг жасадини топди.

Аёллар ўлимини тергов қилиш учун полиция турли соҳа мутахассисларидан иборат махсус гуруҳ тузди. Гуруҳнинг асосий вазифаларидан бири — бу қотилликлар ўзаро боғлиқ ёки йўқлигини аниқлаш.

21-сентябр, душанба куни полиция аёллардан бири — Жабулиле Нтимбойнинг ўлими билан боғлиқ иш доирасида уч киши, яъни икки аёл ва бир эркак қўлга олинганини маълум қилди. Нтимбойнинг жасади энг сўнгги бўлиб, 17-сентябр, пайшанба куни топилганди.

ИОЛ нашрининг ёзишича, сўроқдан кейин эркак қўйиб юборилган, икки аёл эса ҳибсда қолган. Уларга қасддан одам ўлдириш айблови қўйилиши мумкин.

“Биз бу ишлар ўзаро боғлиқ бўлиши мумкинлигини истисно қилмаяпмиз. Аммо Жабулиле Нтимбой ҳолатида, дастлабки маълумотларга кўра, қотилликка севги учбурчаги деб таърифлаш мумкин бўлган муносабатлар сабаб бўлган”, деди полиция вакили Тебелло Мосикили.

Ўша матбуот анжуманида полиция ўнинчи жасад топилгани ҳақида ҳам маълум қилди. У 20-сентябр, якшанба куни кечқурун Ёханнесбургнинг жануби-ғарбидаги Совето ҳудудидан топилган. Бу жой Кемптон-Парк ва аввалги тўққиз жасад топилган ҳудудларнинг қарама-қарши томонида жойлашган.

ЖАР президенти Сирил Рамафоса Экурхуленидаги қотилликлар учун жавобгар шахсларни топиш мақсадида расмийлар барча имкониятларни ишга солишини ваъда қилди. Ҳозирга қадар ҳалок бўлган тўққиз аёлдан саккиз нафарининг шахси аниқланган.

“Уйдан чиқишга қўрқамиз. Ҳатто дўконга боришдан ҳам қўрқамиз. Аёллар ўзини хавфсиз ҳис қилиши керак бўлган мамлакатда энди ўзимизни эркин ҳис қилмаяпмиз”, деди маҳаллий фуқаро Бонгека Себела ББСъга.

Жанубий Африка Республикаси дунёда фемицид — аёлларнинг жинси сабаб ўлдирилиши даражаси энг юқори бўлган мамлакатлардан бири ҳисобланади. БМТ маълумотларига кўра, 2023-йилда мамлакатда гендер зўравонлиги оқибатида 4 мингдан ортиқ аёл ҳалок бўлган. Бу ҳар 100 минг кишига қарийб 12 нафар аёл тўғри келишини англатади ва жаҳон бўйича ўртача кўрсаткичдан бир неча баравар юқори.

2025-йил ноябрида оммавий норозилик намойишларидан сўнг ЖАР ҳукумати аёлларга нисбатан зўравонликни миллий миқёсдаги фалокат деб эълон қилган.