Африканинг энг бой одами, Эфиопия ва Жибути 600 миллион долларлик ёқилғи қувурини қуради
Қувур денгизга чиқиш имконияти бўлмаган Эфиопияда энергетик хавфсизликни мустаҳкамлайди, шу билан бирга Жибути портида иш ўринларини яратади.
Африканинг энг бой одами, Эфиопия ва Жибути 600 миллион долларлик ёқилғи қувурини режалаштирмоқда
Алико Данготе ўз бойлигини Нигерияда цементдан орттирган
Нигериялик миллиардер Алико Данготе Эфиопия ва Жибути билан биргаликда икки давлатни боғловчи 600 миллион долларлик (447 миллион фунт стерлинг) нефть қувури ва омборхона лойиҳасини ишлаб чиқишга келишиб олди.
Лойиҳа Жибутининг Дамержог портидан Эфиопиянинг Девеле шаҳридаги тақсимлаш иншоотигача бўлган 120 километрлик (75 миль) қувурни ҳамда тахминан 400 миллион литр сиғимга эга омборхонани ўз ичига олади.
Унинг 18 ой ичида ишга тушиши кутилмоқда.
Эфиопия Бош вазири Абий Аҳмеднинг айтишича, қувур Жибути портидан Эфиопия пойтахти Аддис-Абебага ёқилғи етказиб бериш вақтини беш кундан бир кунгача қисқартиради.
Биринчи босқичда асосий нефть маҳсулотлари, жумладан, авиация ёқилғиси, дизель ва бензин ташилади.
Пойдевор қўйиш маросимида Данготе ушбу лойиҳа Эфиопиянинг энергетик хавфсизлигини мустаҳкамлашини ва унинг ёқилғи етказиб бериш занжирини янада барқарор қилишини айтди.
Денгизга чиқиш имконияти бўлмаган Эфиопия импорт, жумладан, нефть маҳсулотлари бўйича асосан Жибути портига таянади. Янги инфратузилма транспорт, авиация, қишлоқ хўжалиги ва қурилиш каби соҳаларга хизмат кўрсатувчи мавжуд транспорт тизимларига тушадиган юкламани енгиллаштириши кутилмоқда.
Жибути ҳам порт фаоллигининг ошиши, иш ўринлари яратилиши ва давлат даромадлари кўпайишидан фойда кўриши кутилмоқда.
Ушбу лойиҳа Данготенинг бутун Африка бўйлаб инфратузилма ва ишлаб чиқариш бизнесини кенгайтириш борасидаги кенг кўламли режаларининг бир қисмидир.
«Dangote Cement» йилига тахминан 55 миллион тонна ишлаб чиқариш қувватига эга, унинг Нигериядаги нефтни қайта ишлаш заводи эса ҳозирда кунига 700 000 баррель хом нефтни қайта ишлаш қувватига эга ва бу кўрсаткични икки баравар ошириб, кунига 1,4 миллион баррелга етказишни мақсад қилган.
Яқинда нефтни қайта ишлаш заводи тахминан 1,63 миллиард доллар (1,2 миллиард фунт стерлинг) маблағ йиғиш мақсадида Нигерия фонд биржасида 4,1 миллиард дона оддий акцияларини жойлаштирди.
Кенияда компания келгуси ҳафтада Ламу шаҳрида кунига 700 000 баррель хом нефтни қайта ишлаш қувватига эга бўлиши таклиф этилаётган завод қурилишини бошлашга тайёргарлик кўрмоқда.