“Афғонистонда хориждан молиялаштирилган лойиҳалар чет эл манфаатларига хизмат қилган” — Забиҳуллоҳ Мужоҳид
“Афғонистонда хориждан молиялаштирилган лойиҳалар чет эл манфаатларига хизмат қилган” — Забиҳуллоҳ Мужоҳид
Хорижий давлатлар Афғонистонда ривожланиш лойиҳаларини фақат ўз манфаатларини кўзлаб амалга оширган. Бу ҳақда “Толибон” матбуот котиби Забиҳуллоҳ Мужоҳид маълум қилди.
Қандаҳордаги транспорт лойиҳасининг очилишида сўзга чиққан Мужоҳид ҳозир йирик лойиҳалар Афғонистоннинг ички бюджети ҳисобидан молиялаштирилаётганини айтди. Унинг таъкидлашича, бу лойиҳалар афғон халқининг эҳтиёжларидан келиб чиқади.
“Мамлакатдаги ривожланиш Афғонистон қиёфасини ўзгартиради. Бу лойиҳаларнинг барчаси Афғонистоннинг ўз бюджети ҳисобидан амалга оширилмоқда. Лойиҳаларимиз ҳеч бир давлатга қарам эмас ва ҳеч кимнинг илтимоси билан бажарилмаяпти. Улар афғонларнинг эҳтиёжларига асосланади”, деди Мужоҳид.
Қандаҳор транспорт директори Мавлавий Адамнинг айтишича, Транспорт вазирлиги мамлакатнинг бошқа ҳудудларида бўлгани каби Қандаҳорда ҳам йўлларни бошқариш бўйича муҳим лойиҳаларга эга. Улар иш сифатини таъминлашга ваъда бермоқда.
Маҳаллий аҳоли ҳам йирик ривожланиш лойиҳалари камбағалликни қисқартиришда муҳим эканини таъкидламоқда. Қандаҳорда яшовчи Мирза Султоний йирик лойиҳалар иш ўринлари яратишини ва одамларни камбағалликдан ҳимоя қилишга ёрдам беришини айтди. У ривожланиш билан бирга бандлик таъминланиши муҳимлигини қўшимча қилди.
Яна бир фуқаро Абдул Латиф эса Транспорт вазирлигининг бу лойиҳаси шаҳарни тартибга солишга, иш ўринлари ва қулайликлар яратишга хизмат қилишини билдирди.
Ислом Амирлиги расмийлари Қўштепа канали, мамлакат ҳалқа йўли қурилиши ҳамда ТАПИ ва САСА-1000 лойиҳалари бўйича давом этаётган ишларни ўзларининг энг муҳим ютуқлари қаторига қўшмоқда.