Афғонистон ҳудудида Ўзбекистон ташувчиларидан ундирилаётган йиғимларни мақбуллаштириш масаласи муҳокама қилинди
Ўзбекистон ва Афғонистон транспорт вазирликлари вакиллари учрашувида икки давлат миллий ташувчиларини узоқ вақтдан буён қийнаб келаётган муаммоларни қисқа муддатларда бартараф этиш юзасидан амалий чораларни кўриш бўйича ўзаро келишувга эришилди.
**Афғонистонда Ўзбекистон ташувчиларидан олинадиган йиғимларни тартибга солиш масаласи кўриб чиқилди**
Термиз шаҳрида транспорт вазирининг биринчи ўринбосари Маманбий Омаров бощилигида Афғонистон транспорт ва авиация вазирлиги вакиллари билан икки томонлама учрашув ташкил этилди.
Музокаралар давомида Ўзбекистон ва Афғонистон ўртасида автомобил транспортида халқаро юк ташувларини янада кенгайтириш, миллий ташувчилар учун қулай ва тенг шароитлар яратиш, Афғонистон ҳудудида Ўзбекистон ташувчиларидан ундирилаётган йиғимларни мақбуллаштириш, шунингдек, йиғимларни ўзаро манфаат ва тенглик тамойиллари асосида белгилаш билан боғлиқ масалалар муҳокама қилинди.
Учрашувда Ўзбекистон ва Афғонистон миллий ташувчиларининг таклифлари ва мурожаатлари тингланди. Уларни узоқ вақтдан бери қийнаб келаётган муаммоларни қисқа муддатларда ҳал этиш бўйича амалий чоралар кўриш юзасидан ўзаро келишувга эришилди.