АЕХА: Запорижжя АЕС ҳудудига икки дрон зарба берди
Запорижжя атом электр стансиясида бир неча кун ичида учувчисиз учиш қурилмалари билан боғлиқ учта ҳодиса қайд этилди. АЕХА маълумотига кўра, улардан бирида стансиянинг икки ходими яраланган. Обьектда радиация даражаси меёрда қолмоқда.
АЕХА: Запорижжя атом электр стансияси ҳудудига икки дрон ҳужум қилди
Атом энергияси бўйича халқаро агентлик (АЕХА) 28-август куни хабар беришича, Россия қўшинлари назоратидаги Запорижжя атом электр стансиясида жорий ҳафта давомида дронлар билан боғлиқ учта ҳодиса қайд этилган.
Агентлик маълумотларига кўра, биринчи воқеа 25-август, сешанба куни стансиянинг совутиш ҳовузи яқинида содир бўлган ва натижада АЕСнинг икки ходими жароҳатланган.
Кейинги кун, 26-августда, стансия ҳудудига яна иккита учувчисиз учиш қурилмаси зарба берган. Улардан бири ишлатилган ядро ёқилғисини қуруқ сақлаш майдончасида портлаган бўлса, иккинчиси энергоблоклар тизимига тегишли сув сепиш қурилмасига шикаст етказган.
АЕХА ушбу ҳодисаларга қарамай, Запорижжя АЕСдаги радиация даражаси меъёрда эканлигини маълум қилди.
Агентлик бош директори Рафаел Гросси ядровий обьектларга қилинган ҳужумларни "қабул қилиб бўлмайдиган" ҳолат деб баҳолади. У ядровий авария хавфини олдини олиш мақсадида томонларни яна бир бор максимал даражада ҳарбий вазминликка чақирди.
Запорижжя АЕС 2022-йил апрелидан бери Россия қўшинлари томонидан эгаллаб турилган Украина ҳудудида жойлашган ва Россия томони назорати остида.
АЕХА баёнотида ушбу дронларни ким учиргани ҳақида маълумот берилмаган.