Адидас Зиданнинг афсонавий фаолиятини акс эттирувчи ҳашаматли буцаларни сотувга чиқарди
Адидас Зиданнинг афсонавий фаолиятини ёдга солувчи ҳашаматли буцаларни тақдим этди
Адидас Зиданнинг бренд билан 30 йиллик ҳамкорлигига бағишланган, унинг афсонавий фаолиятига ишора қилувчи рамзий деталларга бой Предатор буцаларининг махсус ҳашаматли версиясини сотувга чиқарди.
Зизу — Предатор моделининг асосий юзи. У айнан шу буцаларда 1998-йилги Жаҳон чемпионатида ғолиб чиққан, 2006-йилги финалда эса машҳур олтин рангли вариантда майдонга тушган эди. Янги модел замонавий технологияларни ва Зиданнинг фаолиятидаги энг ёрқин саҳифаларни ўзида мужассам этади.
Моделнинг асосий хусусиятлари ва деталлари:
Ранги ва миллий рамзлар: Буцалар оқ ва олтин ранглар уйғунлигида тайёрланган. Ташқи томонидаги кўк, оқ ва қизил элементлар унинг Франсия терма жамоасидаги зафарларига ишора қилади.
Шахсий логотип: Қайтарма тилчасида Зиданнинг олтин рангли шахсий логотипи жойлаштирилган. Ушбу логотип дизайни Зизунинг 2002-йилги Чемпионлар лигаси финалида урган машҳур афсонавий голидан илҳомланиб яратилган.
Фаолият географияси: Тилча остидаги эластик тасмаларида Зиданнинг босиб ўтган йўли акс эттирилган. Ўнг буцада унинг профессионал фаолиятида муҳим ўрин тутган шаҳарлар, чап буцада эса бўлажак афсонанинг болалиги ва ёшлиги ўтган Марсел туманлари номлари ёзилган.
Юбилей белгиси: Махсус " ЗЗ30 " маркировкаси футболчи ва бренд ўртасидаги 30 йиллик ҳамкорликни англатади.
Ушбу чекланган миқдордаги оёқ кийимлар (лимитед эдитион) 8-сентабрдан сотувга чиқади. Буцанинг тахминий нархи — 300 евро атрофида.