А мен «хитойликлар»ни яхши кўраман
Ўзбекистонга электромобиллар бозорини ривожлантиришга нима халақит бермоқда?
Мен эса «хитойликларни» яхши кўраман
Ўзбекистон 2026 йилда электр транспортининг тарқалиши рейтингида Ирландияни ортда қолдириб, 19-ўринни эгаллади, дейилади Kept компанияси ҳисоботида. 2024 йилда ЎзР 14-позицияда эди.
Рейтингда биринчи ўринни 78 балл тўплаган Хитой эгаллади. Иккинчи поғонадан 69 балл билан Жанубий Корея, учинчисидан эса 67 балл билан Германия жой олди. Кучли бешликка, шунингдек, тегишлича 66 ва 65 балл олган Ҳиндистон ва АҚШ ҳам кирди. Қозоғистон 40 балл натижа билан 18-ўринни эгаллади.
Марказий Осиёда электромобиль ишлаб чиқариш бўйича етакчиликка қарамай, Ўзбекистон қувватлаш станциялари танқислигини бошдан кечирмоқда. Бундан ташқари, Ўзбекистонда электромобиллар бозори ривожланишига аккумуляторлар маҳаллий ишлаб чиқарилишининг ва жамоат электр транспортининг йўқлиги, шунингдек, соҳани давлат томонидан қўллаб-қувватлаш чораларининг чеклангани тўсқинлик қилмоқда.
Ўзбекистонда 100 минггача электромобиль мавжуд
Тадқиқотга кўра, Ўзбекистондаги электромобиллар парки 50 дан 100 мингтагача машинани ташкил этади. Ушбу кўрсаткич бўйича мамлакат Малайзия ва Россия билан бир гўруҳда жойлашган. Таққослаш учун, Қозоғистонда 30 дан 50 мингтагача электромобиль бор.
Инфратузилмани ривожлантириш категориясида Ўзбекистон мумкин бўлган 20 баллдан бор-yoғи икки балл олди. Қозоғистон ушбу категорияда бирорта ҳам балл тўплай олмади.
Ўзбекистон электрокарлар ишлаб чиқариш бўйича Марказий Осиёда етакчилик қилмоқда
Умумий рейтингда мамлакат юқори бўлмаган ўринни эгаллаган бўлса-да, Ўзбекистон электромобиллар ва гибридлар ишлаб чиқариш бўйича Марказий Осиё етакчисига айланди. Kept маълумотларига кўра, мамлакатда Хитойнинг BYD ва Leapmotor ишлаб чиқарувчилари лойиҳалари амалга оширилмоқда. Уларнинг умумий ишлаб чиқариш қуввати йилига 70 мингта автомобилни ташкил этади. Шу билан бирга, BYD 2030 йилга келиб ишлаб чиқаришни 200 мингта автомобилгача оширишни режалаштирмоқда.
Қозоғистонда ҳам электромобиллар чиқаришга тайёргарлик кўрилмоқда. У ерда Li Auto ва BYD лойиҳалари амалга оширилмоқда, уларнинг серияли ишлаб чиқарилиши 2027 йилда бошланиши керак.
Kept тадқиқоти дунёнинг 30 та мамлакатидаги «яшил» транспорт билан боғлиқ вазиятни таҳлил қилади. Рейтингни тузишда электрокарлар сони, қувватлаш станцияларининг ривожланиши ва давлат имтиёзлари ҳисобга олинган. Ҳисоб-китоблар учун 2026 йилнинг июль ҳолатига кўра долзарб бўлган маълумотлардан фойдаланилган.