75 европарламент депутати Россия нефт ва газидан тўлиқ воз кечишга чақирди
Европарламентнинг 75 депутати Европа Иттифоқи раҳбарларини Россия нефт ва газига тўлиқ эмбарго жорий этиш, янги санксиялар тайёрлаш ва Украинани қўллаб-қувватлашни давом эттиришга чақирди. Улар Россия дизели ва бошқа энергетика маҳсулотлари учун Европа бозорини қайта очмасликни сўраган.
75 нафар европарламент депутати Россия нефт ва газидан бутунлай воз кечишга чақирди
ДВ хабарига кўра, депутатлар 14-октабр куни Европа кенгаши раиси Антониу Кошта ҳамда ЕИ давлатлари раҳбарларига қўшма мактуб юборган.
Европа кенгаши йиғилиши олдидан йўлланган мурожаатда ЕИнинг Россияга нисбатан сиёсатини юмшатмаслик ва бу масалада ягона позиция билдириш зарурлиги таъкидланган.
Мактуб муаллифлари мустаҳкам сулҳ ва тинчлик ўрнатилмагунча, шунингдек, Россия ва унинг шериклари содир этгани айтилган ҳарбий жиноятлар ҳамда тажовуз жиноятлари учун адолат таъминланмагунча Москвага ён берилмаслиги керак, деган фикрда.
Депутатлар Россия Украина ва унинг аҳолисига етказган зарар учун товон, жумладан, репарация тўлаши кераклигини ҳам талаб қилган.
Мурожаатда Россия энергия ресурсларидан тўлиқ воз кечиш бўйича саъй-ҳаракатларни давом эттириш ва нефт ҳамда газ импортига тўлиқ тақиқ жорий этиш таклиф қилинган. Шунингдек, Кремлнинг энергия экспортидан оладиган даромадларини янада камайтиришга қаратилган янги санксиялар пакетини ишлаб чиқиш сўралган.
Депутатлар АҚШ президенти Доналд Трампнинг Россия ва «энергетик сулҳ»га ёндашувини хато деб баҳолаб, Европа раҳбарларини унга эргашмасликка чақирган.
«Сизларни принсипиал позициямизни сақлашга ва Украина ғалаба қозонгунига қадар уни қўллаб-қувватлашга чақирамиз», - дейилади мактубда.
Мазкур талаблар 75 депутатнинг қўшма мурожаати бўлиб, ЕИ томонидан қабул қилинган янги санксия қарори эмас.