70 йил яшаган уйидан кўчирилган 87 ёшли аёл вафот этди - унинг тақдири Испанияда намойишларга сабаб бўлганди
Мадридда қарийб 70 йил яшаган ижара уйидан кўчирилиши Испания бўйлаб норозилик намойишларига сабаб бўлган Марикармен Абаскал 87 ёшида шифохонада вафот этди. Бу ҳақда 7-октабр куни Мадрид ижарачилар уюшмаси маълум қилди.
70 йил яшаган уйидан кўчирилган 87 ёшли аёл вафот этди — унинг тақдири Испанияда норозиликларга сабаб бўлганди
Абаскал Испания пойтахтининг энг қиммат ҳудудларидан бири — Ретиродаги квартирада 1956-йилдан бери яшаб келган. У узоқ йиллар давомида ойига 500 евро ижара тўлаган.
2018-йилда квартира янги компания тасарруфига ўтгач, ижара ҳақи аёлнинг пенсиясидан ҳам юқори даражага кўтарилган. Томонлар ўртасидаги тортишув бир неча йил давом этган.
23-сентабр куни Абаскал суд қарори асосида уйдан чиқарилган. Ўша куни бино атрофида кўчиришга қарши чиққан кўплаб намойищилар тўпланган. Полиция уларни тарқатган, тиббиёт ходимлари эса кекса аёлни шифохонага олиб кетган.
Бу воқеа Испанияда уй-жой муаммосига қарши оммавий намойишларга туртки берган.
28-сентабрда аёлнинг вакиллари уй эгалари билан янги келишувга эришган. Унга кўра, Абаскал учун саккиз йиллик ижара шартномаси тузилиб, ойлик тўлов пенсиясининг учдан бири — тахминан 410 евро этиб белгиланган.
Бу келишув унга уйига қайтиш имконини бериши керак эди. Бироқ аёл шифохонада вафот этган.
Квартира билан боғлиқ низонинг тарихи анча олдинга бориб тақалади. Уни дастлаб Абаскалнинг отаси Франсиско Франко даврида тартибга солинган ижара нархида олган. Отаси вафотидан кейин аёл ёлғиз яшай бошлаган, уй эгалари эса унга янги шартнома имзолашни таклиф қилган.
Аввалги мулкдорлар билан келишмовчилик давом этган бўлса-да, 2018-йилда квартирани сотиб олган компания бозор нархидаги ижара ҳақини талаб қилган.
Абаскал атрофидаги воқеалар Испаниядаги кенгроқ уй-жой инқирози фонида юз берди. Намойишлар ва парламентнинг ҳукумат таклиф қилган уй-жой ислоҳотини рад этиши ортидан бош вазир Педро Санчес 5-октабрда парламентни тарқатиш ҳамда 29-ноябрда муддатидан олдин сайлов ўтказишини эълон қилган.
Ҳукумат таклифлари арзон ижтимоий уй-жой қурилишини кўпайтириш, ижарачилар ҳимоясини кучайтириш ва бўш турган ёки туристларга ижарага бериладиган квартираларга солиқларни ошириш каби чораларни қамраб олган. Ўнг мухолифат ислоҳотни ва уни парламент маъқулловисиз амалга ошириш қарорини танқид қилган.