70 та медаль ва бешинчи ўрин. Ўзбекистон Осиё ўйинларини қандай якунлади
Ўзбекистон Осиё ўйинларини 70 та медаль — 21 та олтин, 25 та кумуш ва 24 та бронза билан якунлади ва бешинчи ўринни эгаллади. Сўнгги олтинни Таҳмина Икромова келтирди. Терма жамоага тўртинчи ўринни эгаллаш учун иккита кумуш медаль етмади. Совриндорларга бериладиган мукофотларнинг умумий суммаси деярли 1 миллион долларга баҳоланмоқда.
70 та медаль ва бешинчи ўрин. Ўзбекистон Осиё ўйинларини қандай якунлади
Ўзбекистон терма жамоаси Аичи-Нагоя Осиё ўйинларининг сўнгги икки кунида ўз ғазнасини яна бешта медаль — битта олтин, иккита кумуш ва иккита бронза билан бойитди. Барча совринлар 3 октябрь куни қўлга киритилди.
Якунда Ўзбекистон XX ёзги Осиё ўйинларини 70 та медаль — 21 та олтин, 25 та кумуш ва 24 та бронза билан якунлади. Умумий ҳисобда жамоа бешинчи ўринни эгаллади. Ҳиндистонда ҳам 21 та олтин бор эди, бироқ у кумуш медаллар сони кўплиги эвазига — 25 га қарши 27 та — тўртинчи бўлди.
Медалларнинг умумий сони бўйича Ўзбекистон Ханчжоудаги аввалги Осиё ўйинлари кўрсаткичини деярли такрорлади: ўшанда спортчилар 71 та соврин — битта кўп олишганди. Аичи-Нагояда олтин медаллар биттага кам, кумуш медаллар еттитага кўп, бронза медаллар эса еттитага кам бўлди. Медаллар жадвалидаги позиция эса ўзгаришсиз қолди — бешинчи ўрин.
Ўзбекистон учун медаллар қўлга киритилган сўнгги кун 3 октябрь бўлди. Спортчилар бешта соврин — битта олтин, иккита кумуш ва иккита бронзани қўлга киритишди. Шундан сўнг делегациянинг якуний натижаси 70 та медалга етди.
Куннинг бош совринини Тахмина Икромова келтирди. Бадиий гимнастика вакиласи яккалик кўпкурашда 112,950 балл тўплаб, ғолиб чиқди.
Бу Икромова учун фаолиятидаги учинчи Осиё ўйинлари олтини бўлди.
Ханчжоудаги аввалги Осиё ўйинларида у бир йўла иккита олий тоифали совринни қўлга киритган эди. Аввалига Икромова, Вилана Савадян ва Эвелина Атальянц таркибидаги Ўзбекистон терма жамоаси жамоавий дастурда биринчи бўлди, сўнгра Икромова яккалик кўпкурашда ҳам 131,300 балл натижа билан ғалаба қозонди.
Шу тариқа, Аичи-Нагояда у шахсий кўпкурашда чемпионлик унвонини ҳимоя қилди ва уч карра Осиё ўйинлари чемпионига айланди.
Таэквондо WT бўйича Марат Мавлонов кумуш медални қўлга киритди. У 80 кг дан юқори вазн тоифасидаги мусобақанинг финалигача етиб бориб, унда Эрон вакилига имкониятни бой берди.
Яна бир кумушни эркин курашчи Шерзод Поёнов келтирди. 97 кг гача бўлган вазн тоифасида у ҳам финалга чиқди ва эронлик рақибига ютқазди.
Аёллар ўртасидаги таэквондода Светлана Саидова (Осипова) бронза медалига сазовор бўлди. 67 кг дан юқори вазн тоифаси ярим финалида у Хитой вакиласига имкониятни бой бериб, мусобақани учинчи ўринда якунлади.
Шу тариқа, фақатгина 3 октябрь кунининг ўзида таэквондо Ўзбекистонга иккита — кумуш ва бронза медалини келтирди.
Терма жамоа сўнгги бронза медалини дзюдо бўйича аралаш жамоавий турнирда қўлга киритди.
Учинчи ўрин учун кечган баҳсда Ўзбекистон Жанубий Корея билан тўқнаш келди ва 4:2 ҳисобида ғалаба қозонди. Ўзбекистон жамоаси билан бирга шоҳсупанинг учинчи поғонасига Хитой ҳам кўтарилди. Олтинни Япония, кумушни Қозоғистон қўлга киритди.
Ушбу соврин ўзбекистонлик дзюдочиларнинг Аичи-Нагоядаги муваффақиятли иштирокига якун ясади. Аввалроқ ушбу спорт турида Сита Қадамбоева, Музаффарбек Тўрабоев, Абдураҳим Нутфуллаев, Шаҳрам Аҳадов, Самариддин Қўчқоров ва Эрназар Сарсенбаев яккалик баҳсларида медалларни қўлга киритишган эди.
3 октябрь куни футбол бўйича Ўзбекистон U-23 эркаклар терма жамоасининг ҳам иштироки якунланди.
Учинчи ўрин учун кечган ўйинда жамоа Хитой билан тўқнаш келди. Рақиб биринчи бўлимда олдинга чиқиб олди, бироқ 43-дақиқада Сардорбек Баҳромов ҳисобни тенглаштирди.
Иккинчи бўлимда Хитой яна олдинга чиқди, аммо 90-дақиқада захирадан майдонга тушган Шодиёр Шодибоев ҳисобни 2:2 кўринишига келтирди. Ғолиб пенальтилар сериясида аниқланди, унда хитойлик футболчилар аниқроқ ҳаракат қилишди. Ўзбекистон футбол турнирини тўртинчи ўринда якунлади.
Аввалроқ Ўзбекистон жамоаси финалга чиқишга яқин келганди. Японияга қарши ярим финалда асосий ва қўшимча вақтлар 1:1 ҳисобида якунланди, шундан сўнг японлар узоқ давом этган пенальтилар сериясида 9:8 ҳисобида ғалаба қозонишди.
Якуний медаллар жадвалида биринчи ўринни 341 та соврин (шундан 169 таси олтин) қўлга киритган Хитой эгаллади. Япония 83 та олтин медаль билан иккинчи, Жанубий Корея 39 та олтин билан учинчи бўлди.
Навбатдаги ёзги Осиё ўйинлари 2030 йилда Доҳада бўлиб ўтади.
Қозоғистон мутлақ кўрсаткич бўйича кўпроқ медаль қўлга киритди — Ўзбекистондаги 70 тага қарши 84 та, бироқ олтин медаллар сони камроқ бўлгани учун пастроқдан жой олди.
Аичи-Нагоя Осиё ўйинларида иштирок этган Ўзбекистон делегацияси 5 октябрь куни махсус чартер рейси билан Тошкентга қайтиб келди.
Аэропортда спортчиларни бош вазир Абдулла Арипов, ҳукумат, Спорт вазирлиги, Миллий олимпия қўмитаси ва Паралимпия қўмитаси, пойтахт ҳокимлиги вакиллари, шунингдек, мухлислар кутиб олишди, деб хабар берди Спорт вазирлиги.
Маросимда спортчиларга президентнинг табриги етказилди. Атлетлар номидан баландликка сакраш бўйича Осиё ўйинлари чемпиони Барнохон Сайфуллаева ва бокс турнири ғолиби Тўрабек Ҳабибуллаев сўзга чиқишди.
Осиё ва Параосиё ўйинлари медаллари учун Ўзбекистон спортчилари ва уларнинг мураббийларига бир марталик пул мукофотлари кўзда тутилган. Тўловлар миқдори Молия вазирлиги, Марказий банк ва Спорт вазирлигининг Адлия вазирлиги томонидан 1657-сон билан рўйхатга олинган қўшма қарори билан белгиланган.
Олтин медаль учун спортчи 25 минг доллар, мураббий — 10 минг доллар олади. Кумуш учун тегишли равишда 12 минг ва 5000 доллар, бронза учун эса — 6250 ва 2500 доллар кўзда тутилган.
Мукофотлар тўлов кунидаги Марказий банк курси бўйича сўмда тўланади.
Агар ҳар бир медаль учун белгиланган тўловлардан келиб чиқилса, унда 21 та олтин, 25 та кумуш ва 24 та бронза совринлари учун Ўзбекистон спортчиларига умумий ҳисобда 975 минг доллар берилиши керак.
Ушбу сумманинг 525 минг доллари олтин медаллар, 300 минг доллари — кумуш ва 150 минг доллари — бронза медаллар ҳиссасига тўғри келади. Бу фақат спортчиларга бериладиган тўловлар ҳисоб-китоби бўлиб, мураббийларнинг мукофот пуллари бунга киритилмаган.